منچن آباد(راشد ڈھڈی)
منچن آباد ماڈل بازار میں ناقص ٹف ٹائلز بیٹھنے کا سخت نوٹس،فوری تعمیرِ نو کا حکم۔ڈپٹی کمشنر بہاولنگر نے منچن آباد میں قائم ماڈل بازار کا مفصل دورہ کیا۔دورے کے دوران انہوں نے بازار میں خریداروں کے لیے دستیاب سہولیات،صفائی ستھرائی کے انتظامات اور حال ہی میں کروائے گئے ترقیاتی کاموں کا تفصیلی جائزہ لیا۔معائنے کے دوران حال ہی میں لگائی گئی ٹف ٹائلز کی بدحالی اور ناقص کوالٹی کا سچ سامنے آ گیا۔حالیہ بارشوں کے باعث ناقص مٹیریل، ناقص پلاننگ اور غیر معیاری کام کی وجہ سے مختلف مقامات سے ٹف ٹائلز بیٹھ چکی تھیں،جس سے نہ صرف بازار کا حسن متاثر ہوا بلکہ خریداروں اور تاجروں کو بھی آمدورفت میں شدید مشکلات کا سامنا کرنا پڑ رہا تھا۔ڈپٹی کمشنر بہاولنگر نے صورتحال کا سخت نوٹس لیتے ہوئے متعلقہ انتظامیہ اور ٹھیکیدار کی شدید سرزنش کی اور موقع پر ہی ہدایت جاری کی کہ ناقص ٹف ٹائلز کو اکھاڑ کر معیاری مٹیریل کے ساتھ فوری طور پر دوبارہ لگایا جائے۔ انہوں نے واضح کیا کہ کام کے معیار پر کوئی سمجھوتہ نہ کیا جائے۔اس موقع پر انہوں نے گفتگو کرتے ہوئے کہا کہ "عوامی منصوبوں میں کسی قسم کا ناقص مٹیریل یا غفلت ہرگز برداشت نہیں کی جائے گی۔ سرکاری فنڈز عوام کی امانت ہیں اور ان کا شفاف استعمال ہماری پہلی ترجیح ہے۔”ڈپٹی کمشنر نے متعلقہ حکام کو ہدایت کی کہ تمام بیٹھی ہوئی ٹائلز کا کام فوری مکمل کر کے رپورٹ پیش کی جائے تاکہ عوام کو درپیش پریشانی کا سدباب ہو سکے۔