کاکروچ جنتا پارٹی کا احتجاج ختم کرنے کا اعلان، پرہلاد جوشی کو وزارت تعلیم کا چارج مل گیا

نئی دہلی :کاکروچ جنتا پارٹی کی جانب سے ترجمان نے اعلان کیا ہے کہ ’حکومت کی جانب سے تنظیم کے دیگر مطالبات بھی تسلیم کیے جانے کے بعد احتجاج ختم کیا جا رہا ہے۔‘
ترجمان کے مطابق حکومت کی جانب سے مطالبات منظور کیے جانے کے بعد تنظیم نے اپنا احتجاج باضابطہ طور پر واپس لینے کا فیصلہ کیا ہے۔
دوسری جانب پارلیمنٹ میں قائدِ حزبِ اختلاف راہول گاندھی نے انڈیا کے وزیرِ تعلیم دھرمیندر پردھان کے استعفے کو ’تعلیمی نظام کی اصلاح کی جانب ایک بڑا قدم‘ قرار دیا ہے۔
راہول گاندھی نے ایکس پر اپنے بیان میں کہا کہ ’ان تمام نوجوانوں اور طلبہ کو دلی مبارک باد جنھوں نے جمہوریت، آئین اور اپنے مستقبل کے تحفظ کے لیے سڑکوں پر نکل کر ثابت قدمی کا مظاہرہ کیا۔‘
دوسری طرف انڈین صدر دروپدی مرمو نے ایک سرکاری اعلامیے میں کہا ہے کہ انھوں نے وزیراعظم نریندر مودی کے مشورے پر وفاقی وزیر پرہلاد جوشی کو وزارتِ تعلیم کا اضافی چارج سونپنے کی منظوری دے دی ہے۔
اعلامیے کے مطابق پرہلاد جوشی بدستور صارفین کے امور، خوراک اور عوامی تقسیم کے وفاقی وزیر رہیں گے، جبکہ ان کے پاس قابلِ تجدید توانائی کی وزارت بھی برقرار رہے گی۔