بھائی اور ماموں کی جانب سے مبینہ طور پر پیسوں کا مطالبہ اور جان سے مارنے کی دھمکیوں کے خلاف احتجاج

نوشہرو فیروز: ( رپورٹ ڈسٹرکٹ رپورٹر رجب علی سمون )
بھائی اور ماموں کی جانب سے مبینہ طور پر پیسوں کا مطالبہ اور جان سے مارنے کی دھمکیوں کے خلاف احتجاج,
نوشہرو فیروز کی عرب کالونی کے رہائشی شکیل احمد عباسی نے اپنی والدہ مسمات حمیدہ کے ہمراہ پریس کلب نوشہرو فیروز پہنچ کر احتجاج کرتے ہوئے صحافیوں کو بتایا کہ وہ عرب کالونی میں رہائش پذیر ہیں۔
شکیل احمد عباسی کا کہنا تھا کہ ان کا بھائی عبدالرشید عباسی بری صحبت میں پڑ کر غلط کاموں میں ملوث تھا، جس کے بعد انہوں نے اس سے لاتعلقی کا اظہار کیا۔ اس کے بعد ان کا بھائی ان کی جان کا دشمن بن گیا ہے۔
انہوں نے الزام عائد کیا کہ ان کا بھائی عبدالرشید عباسی اور ماموں قمرالدین رات کے وقت ان کے گھر آکر پیسوں کا مطالبہ کرتے ہیں اور انکار کرنے پر انہیں جان سے مارنے کی دھمکیاں دیتے رہتے ہیں۔
شکیل احمد عباسی نے مزید بتایا کہ وہ نوابشاہ میں مزدوری کرتے ہیں اور ان کی غیر موجودگی میں مبینہ ملزمان ان کے گھر پہنچ کر ان کی اہلیہ کو ہراساں اور پریشان کرتے رہتے ہیں، جس کے باعث وہ اور ان کا خاندان خوف و ہراس اور بے چینی کی صورتحال میں زندگی گزارنے پر مجبور ہیں۔
انہوں نے اعلیٰ حکام، ضلعی انتظامیہ اور پولیس سے مطالبہ کیا کہ انہیں اور ان کے خاندان کو تحفظ فراہم کیا جائے اور مبینہ ملزمان کے خلاف قانون کے مطابق کارروائی کی جائے۔