وفاقی وزیراطلاعات عطااللہ تارڑ کی گاڑی کے قریب فائرنگ کرنیوالا کون تھا؟ اہم انکشاف

لاہور: لاہور کے علاقے ڈیفنس میں وفاقی وزیر اطلاعات عطاء اللہ تارڑ کی گاڑی کے قریب فائرنگ کا واقعہ پیش آیا۔ پولیس کے مطابق ایک کار سوار نوجوان نے وفاقی وزیر کی گاڑی کو اوورٹیک کرنے کے بعد فائرنگ کی۔ پولیس کا کہنا ہے کہ واقعہ گزشتہ رات ڈیفنس اے کی حدود میں پیش آیا۔ ملزم کی گرفتاری کے لیے سیف سٹی اتھارٹی کی جدید ٹیکنالوجی اور کیمروں کی مدد سے کارروائی کی گئی، جس کے بعد ملزم اسامہ کو اسلحہ سمیت گرفتار کر لیا گیا، جبکہ اس کے زیر استعمال گاڑی بھی تحویل میں لے لی گئی۔

وفاقی وزیر اطلاعات عطاء اللہ تارڑ کس کہنا تھا کہ وہ اپنے اہل خانہ کے ہمراہ جا رہے تھے کہ ایک گاڑی نے بائیں جانب سے اوورٹیک کیا اور پانچ فائر کیے۔ انہوں نے کہا کہ واقعے کے فوراً بعد مشتبہ گاڑی کا پیچھا کیا گیا اور قریبی پولیس ناکے کو اطلاع دی گئی، جس پر پولیس نے فوری کارروائی کرتے ہوئے ملزم کو گرفتار کر لیا۔ پولیس واقعے کی مختلف پہلوؤں سے تحقیقات کر رہی ہے تاکہ فائرنگ کے محرکات اور ملزم کے ممکنہ ارادوں کا تعین کیا جا سکے۔