چکوال رپورٹ: جلیل نقوی
بھگوال: محلہ گلزار آباد کے رہائشی آج بھی بجلی، پکی گلیوں اور دیگر بنیادی سہولیات سے محروم ہیں۔ تقریباً 70 سے 80 افراد پر مشتمل یہ آبادی فوکل پرسن، منتخب نمائندوں، ضلعی انتظامیہ اور متعلقہ حکام کی توجہ کی منتظر ہے۔ہمارے نمائندے سے گفتگو کرتے ہوئے ایک مقامی رہائشی (ن) نے بتایا کہ آج تک محلے میں بجلی کی سہولت فراہم نہیں کی گئی۔ ان کا کہنا تھا کہ معمولی بارش کے بعد بھی گلیاں کیچڑ میں تبدیل ہو جاتی ہیں اور راستے بند ہو جاتے ہیں۔ ایسی صورتحال میں اگر کسی مریض کو فوری طور پر ہسپتال منتقل کرنا پڑے تو شدید مشکلات کا سامنا کرنا پڑتا ہے، جو کسی بھی وقت جان لیوا ثابت ہو سکتا ہے۔ہماری تحقیقات کے مطابق محلہ گلزار آباد کی کچی گلیوں میں بارش کا پانی جمع رہتا ہے، جس سے نہ صرف آمدورفت متاثر ہوتی ہے بلکہ ڈینگی سمیت مختلف بیماریوں کے پھیلنے کا خدشہ بھی بڑھ رہا ہے۔ اہلِ علاقہ نے حکومت پنجاب، ضلعی انتظامیہ اور متعلقہ اداروں سے مطالبہ کیا ہے کہ محلے میں بجلی، پکی گلیوں اور نکاسی آب سمیت بنیادی سہولیات کی فراہمی کے لیے فوری عملی اقدامات کیے جائیں۔