لاہور: وزیراعلیٰ پنجاب مریم نواز شریف نے صوبے کے ان علاقوں میں جہاں زیرِ زمین پانی مضرِ صحت ہے، صاف پانی کی فراہمی یقینی بنانے کے لیے اہم پیش رفت کی ہے۔ اس سلسلے میں منعقدہ ایک خصوصی اجلاس میں وزیراعلیٰ کو بریفنگ دی گئی کہ خوشاب، ڈی جی خان، بہاولپور اور رحیم یار خان میں واٹر بوٹلنگ پلانٹس مکمل طور پر تیار اور فعال ہو چکے ہیں۔
اجلاس میں فیصلہ کیا گیا کہ جن علاقوں میں پانی انتہائی خراب ہے، وہاں حکومتی بوٹلنگ پلانٹس سے پانی کی بوتلیں ٹرکوں کے ذریعے گھر گھر پہنچائی جائیں گی۔ وزیراعلیٰ نے خوشاب بوٹلنگ پلانٹ کی ڈیجیٹل رپورٹ کا جائزہ لیا جس کی فی گھنٹہ واٹر پروڈکشن کی استعداد 50 ہزار لیٹر تک ہے۔
مریم نواز شریف نے تمام ڈپٹی کمشنرز کو ہدایت کی کہ وہ اپنے اضلاع میں خراب پانی والے علاقوں کی فوری نشاندہی کریں اور وہاں صاف پانی کی فراہمی کو یقینی بنائیں۔ انہوں نے واٹر فلٹریشن پلانٹس کی بندش اور خرابی کی شکایات پر سخت نوٹس لیتے ہوئے انہیں فوری طور پر بحال کرنے کا حکم دیا اور کہا کہ "عوام کو صاف پانی کی فراہمی میں کوتاہی برداشت نہیں کی جائے گی۔”
مزید پلانٹس: سی ایم پنجاب صاف پانی پراجیکٹ کے تحت مزید چار بوٹلنگ پلانٹ قائم کیے جائیں گے۔
فلٹریشن پلانٹس: صوبہ بھر میں 2258 نئے واٹر فلٹریشن پلانٹ نصب کیے جائیں گے۔
کلسٹر بیسڈ پلانٹس: صاف پانی کی مسلسل فراہمی کے لیے واٹر ٹینک والے کلسٹر بیسڈ پلانٹ بھی بنائے جائیں گے۔ پہلے مرحلے میں بہاولپور ڈویژن میں 22 اور راجن پور میں 10 کلسٹر بیسڈ پلانٹ قائم کیے جائیں گے۔
وزیراعلیٰ نے کہا کہ صحت مند معاشرے کی تشکیل کے لیے صاف پانی بنیادی ضرورت ہے اور حکومت اس مقصد کے لیے ہر ممکن وسائل بروئے کار لا رہی ہے۔ انہوں نے ڈپٹی کمشنرز کو ہدایت کی کہ وہ اپنے اضلاع میں موجود تمام بند پلانٹس کو جلد از جلد فعال بنا کر رپورٹ پیش کریں۔