فٹ بال کی تاریخ کا مہنگا ترین سودا:ٹکٹوں کے بعد اب میدان کی مٹی بھی بکنے لگی

نیو یارک/ نیو جرسی:عالمی فٹ بال کی نگران تنظیم ‘فیفا’ (FIFA) نے ورلڈ کپ 2026 کے فائنل میچ کے بعد نیو جرسی کے میٹ لائف (MetLife) اسٹیڈیم کی گھاس کے چھوٹے ٹکڑے فروخت کرنے کا اعلان کر کے ایک نئی بحث چھیڑ دی ہے۔
یہ اقدام ایک ایسے وقت میں سامنے آیا ہے جب پہلے ہی ورلڈ کپ کے ٹکٹوں کی آسمان کو چھوتی قیمتوں پر فیفا کو شدید تنقید کا سامنا ہے۔ فیفا کی آفیشل ویب سائٹ پر "پِیس آف دی پچ” (Piece of the Pitch) کے نام سے یہ مجموعہ متعارف کرایا گیا ہے۔ اس کے مختلف درجات (Tiers) ہیں، جن میں بنیادی "فاؤنڈیشن ایڈیشن” کی قیمت 450 امریکی ڈالر رکھی گئی ہے۔ اس سے بھی مہنگے ورژن موجود ہیں جن کی قیمت 3,000 ڈالر تک جاتی ہے۔
ہر ٹکڑا ایک پریمیم ایکریلک کیس میں محفوظ ہوگا، جس کے ساتھ ایک USB کیپ بھی دی جائے گی جس میں میچ کی تصدیقی ویڈیو (Authenticity film) موجود ہوگی۔
یہ گھاس فی الحال صرف امریکا اور یورپ کے رہائشیوں کو ہی بھیجی جائے گی اور اس کی ڈیلیوری فائنل میچ کے بعد ممکن ہوگی۔
دلچسپ بات یہ ہے کہ یہ وہی گراؤنڈ ہے جس کی پچ کے معیار پر خود کھلاڑیوں اور کوچز نے تنقید کی ہے۔ میٹ لائف اسٹیڈیم عموماً این ایف ایل (NFL) کے میچوں کے لیے مصنوعی گھاس (Artificial turf) استعمال کرتا ہے، تاہم ورلڈ کپ کے لیے یہاں عارضی طور پر قدرتی گھاس بچھائی گئی تھی۔ برازیل اور فرانس جیسی بڑی ٹیموں کے کھلاڑیوں نے اس پچ کو "سخت، خشک اور سست” قرار دیا ہے، جس سے اس کی کارکردگی پر سوالات اٹھ رہے ہیں۔
گھاس کی یہ فروخت فیفا کے لیے عوامی غم و غصے میں اضافے کا باعث بنی ہے۔ ٹورنامنٹ کے فائنل کے لیے عام ٹکٹ 32,970 ڈالر تک میں فروخت ہو رہے ہیں، جبکہ کھانے پینے کی سہولیات کے ساتھ "ہاسپیٹلٹی ٹکٹ” 34,500 ڈالر تک کی بھاری قیمت پر دستیاب ہیں۔ کرکٹ اور فٹ بال کے شائقین اور ناقدین کا ماننا ہے کہ فیفا ورلڈ کپ کو ایک تجارتی میلے میں بدل رہا ہے جہاں اب کھیل کے میدان کی مٹی اور گھاس تک کو سونے کے بھاؤ فروخت کیا جا رہا ہے۔ کیا ایک عام فٹ بال پرستار، جو ہزاروں ڈالر کے ٹکٹ خریدنے کی استطاعت نہیں رکھتا، اس "تاریخی ٹکڑے” کو خرید پائے گا؟ یہ ایک ایسا سوال ہے جو سوشل میڈیا پر بحث کا موضوع بنا ہوا ہے۔