تحریکِ آزادیِ کشمیر کا روشن ترین باب: مریم نواز شریف نے شہداء کو سلام پیش کر دیا

لاہور:وزیراعلیٰ پنجاب مریم نواز شریف نے 13 جولائی کو یومِ شہدائے کشمیر کے موقع پر تحریکِ آزادیِ کشمیر کے شہداء کو شاندار خراجِ عقیدت پیش کیا ہے۔ اپنے خصوصی پیغام میں انہوں نے 13 جولائی 1931 کے 22 شہداء سمیت تحریکِ آزادی کے لیے جانوں کا نذرانہ پیش کرنے والے تمام کشمیریوں کی قربانیوں کو خراجِ تحسین پیش کیا ہے۔
وزیراعلیٰ نے کہا کہ کشمیری شہداء کا لہو آزادی کی ایک ایسی عظیم داستان ہے جو تاریخ کے ہر دور میں یاد رکھی جائے گی۔ انہوں نے اس عزم کا اعادہ کیا کہ مقبوضہ جموں و کشمیر کے عوام نے اپنے خون سے آزادی کی جو شمع روشن کی ہے، وہ آج بھی کشمیریوں کے عزم و حوصلے کی صورت میں زندہ ہے۔ انہوں نے اس یقین کا اظہار کیا کہ کشمیریوں کی یہ لازوال قربانیاں کبھی رائیگاں نہیں جائیں گی اور وہ دن دور نہیں جب اہلِ کشمیر آزادی کی صبح کا مشاہدہ کریں گے۔
مریم نواز شریف نے عالمی برادری پر زور دیا کہ وہ اقوامِ متحدہ کی قراردادوں کے مطابق کشمیریوں کو ان کا جائز حقِ خود ارادیت دلوانے کے لیے اپنا موثر اور کلیدی کردار ادا کرے۔ انہوں نے کہا کہ پاکستان، مقبوضہ جموں و کشمیر کے کشمیری بہن بھائیوں کے ساتھ کھڑا ہے اور ان کی اخلاقی، سیاسی اور سفارتی حمایت جاری رکھے گا۔
وزیراعلیٰ پنجاب نے حقِ خود ارادیت کے حصول کے لیے سینوں پر گولیاں کھانے والے کشمیری بہن بھائیوں کے اٹوٹ عزم کو سلام پیش کرتے ہوئے کہا کہ شہدائے کشمیر کی قربانیاں تحریکِ آزادی کا سب سے روشن باب ہیں۔