بہار: مسلم خاتون کا نقاب ہٹا کر زبردستی سندھور لگوانےپر بھارت میں غم وغصہ، دو ملزمان گرفتار

نوادہ:
بہار کے ضلع نوادہ میں ایک برقعہ پوش خاتون کے ساتھ بدسلوکی اور ان کے ماتھے پر زبردستی سندھور لگوانے کی ویڈیو وائرل ہونے کے بعد پولیس نے کارروائی کرتے ہوئے دو مرکزی ملزمان کو گرفتار کر لیا ہے۔ اس واقعے نے سوشل میڈیا پر شدید غم و غصے کو جنم دیا ہے۔
پولیس کے مطابق، یہ لرزہ خیز واقعہ ناردی گنج تھانہ کے علاقے کمال پور گاؤں کے قریب پیش آیا۔ سوشل میڈیا پر گردش کرنے والی ویڈیو میں دیکھا جا سکتا ہے کہ کچھ افراد خاتون اور ان کے ساتھ موجود نوجوان کو گھیرے ہوئے ہیں۔ ویڈیو میں خاتون کو بار بار منت سماجت کرتے ہوئے سنا جا سکتا ہے، جبکہ ملزمان ان کا نقاب ہٹانے اور ساتھ موجود نوجوان پر خاتون کے ماتھے پر سندھور لگانے کے لیے دباؤ ڈالنے کی کوشش کر رہے ہیں۔ اس دوران وہاں موجود افراد مذہبی نعرے بھی لگاتے رہے۔
واقعہ وائرل ہونے کے بعد ابتدائی طور پر سوشل میڈیا پر یہ دعویٰ کیا گیا تھا کہ یہ مختلف مذاہب سے تعلق رکھنے والے جوڑے کے خلاف کارروائی ہے، تاہم پولیس کی جانب سے کی گئی تحقیقات نے اس تاثر کو غلط ثابت کر دیا۔ پولیس نے تصدیق کی ہے کہ متاثرہ خاتون اور ان کے ساتھ موجود نوجوان دونوں مسلمان ہیں اور آپس میں کزن (قریبی رشتہ دار) ہیں۔ یہ دونوں ایک شادی کی تقریب سے شرکت کے بعد اپنے گھر واپس جا رہے تھے کہ ملزمان نے انہیں راستے میں روک کر ہراساں کیا۔