ایران پر دوسرے روز بھی امریکی حملے، 90 اہداف کو نشانہ بنایا، سینٹکام،ایران کے جوابی میزائل حملے، تہران شدت سے معاہدہ امن چاہتا ہے، ٹرمپ

    تہران+واشنگٹن+اسلام آباد:ایران پر امریکی حملوں کا دوسرا روز، بندر عباس،بوشہر،سیستان اور دیگر علاقوں پر سینٹکام کے مسلسل حملے، پاسداران انقلاب کے بحرین کویت اور قطر پر جوابی حملے ، یہ جنگ نہیں ایران معاہدہ چاہتا ہے، صدر ڈونلڈ ٹرمپ
    امریکی صدر ڈونلڈ ٹرمپ نے کہا ہے کہ ایران نے ’کچھ دیر پہلے رابطہ کیا تھا۔ وہ معاہدہ کرنے کے بہت زیادہ خواہش مند ہیں۔‘
    صدارتی جہاز ائیرفورس ون پر صحافیوں سے گفتگو کرتے ہوئے ٹرمپ نے مزید کہا: ’میں نہیں جانتا کہ ان کے ساتھ معاہدہ کرنا واقعی فائدہ مند ہو گا یا نہیں۔ مسئلہ یہ ہے کہ میں نہیں جانتا کہ آیا وہ معاہدے کا احترام کریں گے یا نہیں۔‘
    امریکی صدر ٹرمپ سے سوال کیا گیا کہ کیا امریکہ ایران کے ساتھ ایک مکمل فوجی تنازع کی طرف واپس جا رہا ہے، تو انھوں نے کہا: ’میں نہیں جانتا۔ لیکن ہم بہت جلد جیت جائیں گے۔‘
    ٹرمپ نے کہا کہ ’ہم نے انھیں (ایران کو) بہت شدت سے نشانہ بنایا ہے اور میں یہاں آج یہ بات کہوں گا کہ ہم نے انھیں 20 گنا زیادہ طاقت سے جواب دیا ہے۔‘
    امریکی صدر ڈونلڈ ٹرمپ کی جانب سے اس ہفتے دوسری رات ایران کو سخت نشانہ بنانے کی دھمکی کے چند گھنٹوں بعد امریکی سینٹرل کمانڈ نے تصدیق کی کہ ایران کے خلاف مزید حملے جاری ہیں۔امریکی فوج کی مرکزی کمان (سینٹ کام) نے اعلان کیا ہے کہ آٹھ جولائی کو ایران کے خلاف کارروائی میں تقریباً 90 فوجی اہداف کو نشانہ بنایا گیا۔سوشل میڈیا ویب سائٹ ایکس پر جاری بیان میں سینٹ کام نے کہا کہ ایران میں فضائی دفاع کے نظام، ساحلی نگرانی کے وسائل، میزائلز اور ڈرونز کی ذخیرہ گاہوں، بحری صلاحیتوں اور ایران کے ساحلی علاقوں میں واقع فوجی لاجسٹکس کے بنیادی ڈھانچے پر حملے کیے گئے۔


    ایرانی ذرائع ابلاغ کے مطابق ملک کے جنوبی ساحلی علاقوں میں دھماکوں کی آوازیں سنی گئی ہیں۔ تاہم امریکی حکام کی جانب سے سوشل میڈیا پر جاری بیان میں کہا کہ ان کارروائیوں کا مقصد تہران کی آبنائے ہرمز میں ’آزادانہ بحری آمدورفت کو خطرے میں ڈالنے کی صلاحیت کو مزید کمزور کرنا‘ ہے۔
    امریکی حکام کی جانب سے جاری بیان میں کہا گیا کہ ’امریکہ تجارتی بحری جہازوں کے خلاف حالیہ ’بلا جواز جارحیت‘ پر ایران کو جوابدہ ٹھہرا رہا ہے، جو ایک اہم بین الاقوامی آبی گزرگاہ سے گزر رہے تھے۔
    ایرانی نشریاتی ادارے کے مطابق مقامی ذرائع کا حوالہ دیتے ہوئے بتایا گیا ہے کہ صوبہ سیستان و بلوچستان کے شہر ایرانشہر کے ہوائی اڈے کی عمارت اور رن وے میں دھماکے کے بعد فضا میں دھوئیں کے بادل دیکھے گئے۔
    خبر رساں ادارے مہر نے رپورٹ کیا کہ مقامی وقت کے مطابق رات تقریباً 11 بج کر 15 منٹ پر بندرعباس اور سیریک کے علاقوں میں کئی دھماکوں کی آوازیں سنی گئیں۔
    چابہار اور کنارک میں کم از کم 10 دھماکوں کی آوازیں سنی گئیں، جبکہ چابہار شہر کے ایک حصے میں بجلی بھی منقطع ہو گئی۔ امریکی جنگی طیاروں نے چابہار میں پاسدارانِ انقلابِ کی بحریہ کے اڈے پر بمباری کی۔ یران کے ساحلی علاقوں پر امریکی حملوں میں چابہار بندرگاہ کی شہید بہشتی اور کلانتری گھاٹ کے علاوہ بحری ٹریفک کنٹرول ٹاور کو بھی نشانہ بنایا گیا۔
    ایران کے پاسدارارن انقلاب نے کہا ہے کہ اس کی بحریہ اور ایرو اسپیس فورسز نے کویت اور بحرین میں امریکی اڈوں کو نشانہ بنانے کے لیے ایک مشترکہ میزائل اور ڈرون آپریشن کیا جسے سےان اڈوں پر اہم بنیادی ڈھانچہ اور تنصیبات کو نقصان پہنچا ہے۔
    بیان میں کہا گیا ہے کہ حملوں میں کویت میں عارفجان اور علی السلم کے اڈوں کے علاوہ بحرین میں جفیر اور شیخ عیسیٰ کے ٹھکانوں کو نشانہ بنایا گیا۔ آئی آر جی سی نے خبردار کیا کہ مزید امریکی حملے خطے میں امریکی اڈوں کے خلاف اضافی ردعمل کا باعث بنیں گے۔


    قطر نے خطے کی سطح بڑھا دی تاہم کچھ گھنٹوں کے بعد اسے واپس لے کر صورت حال کو نارمل قرار دیا ہے۔


    بحرین کی وزارتِ داخلہ نے سوشل میڈیا ویب سائٹ ایکس پر اعلان کیا ہے کہ ملک میں خطرے کے سائرن بجا دیے گئے ہیں۔
    وزارت داخلہ کے پیغام میں شہریوں سے اپیل کی گئی ہے کہ وہ پرسکون رہیں اور قریبی محفوظ مقام کی جانب چلے جائیں۔


    سوشل میڈیا ویب سائٹ ایکس پر جاری بیان میں کویتی فوج نے کہا ہے کہ فضائی دفاع کا نظام دشمن کے میزائل اور ڈرون حملوں کا سامنا کر رہا ہے۔
    بیان میں کہا گیا ہے کہ ’اگر دھماکوں کی آوازیں سنائی دیں تو وہ فضائی دفاعی نظام کی جانب سے دشمن کے حملوں کو ناکام بنانے کی کارروائیوں کا نتیجہ ہیں۔‘
    ایکس پر پیغام میں کویتی فوج نے عوام سے درخواست کی ہے کہ وہ متعلقہ حکام کی جانب سے جاری کردہ سکیورٹی اور حفاظتی ہدایات پر عمل کریں۔

    Related Posts