نواب شاہ (رپورٹ: نفیس آرائیں)
محکمہ اسپیشل ایجوکیشن حکومتِ سندھ اور سماجی تنظیم ہیلپنگ ہینڈ کے اشتراک سے ایچ ایم خواجہ آڈیٹوریم میں معاون آلات کی تقسیم کی تقریب منعقد ہوئی، جس میں رکن سندھ اسمبلی غلام قادر چانڈیو، ڈپٹی کمشنر شہید بینظیرآباد عبدالصمد نظامانی، ہیلپنگ ہینڈ سندھ کے مینیجر علی محمد پٹھان، ڈسٹرکٹ مینیجر شاہ رخ سلیم، ریجنل ڈائریکٹر نثار احمد بروہی اور دیگر نے 150 سے زائد خصوصی افراد اور بچوں میں وہیل چیئرز، واکرز، بیساکھیاں، مصنوعی اعضا، سماعتی آلات اور دیگر معاون طبی آلات بلا معاوضہ تقسیم کیے۔تقریب سے خطاب کرتے ہوئے مقررین نے کہا کہ حکومتِ سندھ خصوصی افراد کو معاشرے کا فعال اور خودمختار شہری بنانے، انہیں مساوی مواقع فراہم کرنے اور ان کی فلاح و بہبود کے لیے مؤثر اقدامات کر رہی ہے۔ انہوں نے ہیلپنگ ہینڈ کی خدمات کو سراہتے ہوئے کہا کہ ایسے فلاحی پروگرام خصوصی افراد کی زندگی میں مثبت تبدیلی لانے میں اہم کردار ادا کرتے ہیں۔ڈسٹرکٹ مینیجر ہیلپنگ ہینڈ شاہ رخ سلیم نے کہا کہ پروگرام کا مقصد جسمانی معذوری کا شکار افراد کی نقل و حرکت میں سہولت فراہم کرنا اور انہیں باوقار و خودمختار زندگی گزارنے کے قابل بنانا ہے۔ تقریب میں اسپیشل ایجوکیشن کے افسران، خصوصی افراد اور ان کے اہلِ خانہ نے بڑی تعداد میں شرکت کی، جبکہ مستحقین نے معاون آلات کی فراہمی پر حکومتِ سندھ اور ہیلپنگ ہینڈ کا شکریہ ادا کیا۔