نواب شاہ (رپورٹ: نفیس آرائیں)
میونسپل کارپوریشن نواب شاہ کے مالی سال 2026-27 کے بجٹ اجلاس کی دوسری کارروائی میئر قاضی محمد رشید بھٹی اور ڈپٹی میئر چوہدری مبشر آرائیں کی مشترکہ صدارت میں منعقد ہوئی، جس میں کارپوریشن کے آئندہ مالی سال کے تخمینہ بجٹ کو اراکین کی اکثریتی رائے سے منظور کر لیا گیااجلاس میں بتایا گیا کہ مالی سال 2026-27 کا تخمینہ بجٹ، مالی سال 2025-26 کے نظرثانی شدہ بجٹ کو مدنظر رکھتے ہوئے مرتب کیا گیا ہے۔
بجٹ دستاویزات کے مطابق مجموعی آمدنی کا تخمینہ 2 ارب 77 کروڑ 33 لاکھ 57 ہزار 232 روپے جبکہ مجموعی اخراجات کا تخمینہ 2 ارب 77 کروڑ 27 لاکھ 15 ہزار 314 روپے رکھا گیا ہے۔ بجٹ میں 6 لاکھ 41 ہزار 918 روپے کی معمولی بچت ظاہر کی گئی ہے۔
آمدنی کے اہم ذرائع میں ٹیکس محصولات، فیسیں، کرایہ، کنزروینسی ٹیکس، بقایاجات اور دیگر وصولیاں شامل ہیں، جبکہ اخراجات میں تنخواہیں، پنشن، مرمت و دیکھ بھال، ترقیاتی منصوبے، جاری اخراجات، واجبات اور دیگر انتظامی مصارف شامل کیے گئے ہیں۔