نواب شاہ: (رپورٹ نفیس آرائیں)
ایس ایس پی شہید بینظیر آباد سمیر نور چنہ کی ہدایت پر ضلع بھر میں جرائم پیشہ عناصر کے خلاف جاری کریک ڈاؤن کے دوران پولیس نے مختلف کارروائیوں میں موٹر سائیکل چور گینگ کے سرغنہ سمیت متعدد مطلوب اور روپوش ملزمان کو گرفتار کر لیا، جبکہ چوری شدہ موٹر سائیکلیں اور غیر قانونی اسلحہ بھی برآمد کر لیا گیا۔پولیس کے مطابق تھانہ قاضی احمد کی ٹیم نے کارروائی کرتے ہوئے موٹر سائیکل چوری میں ملوث گینگ کے مرکزی ملزم نظام عرف مرتضیٰ بھٹو کو گرفتار کرکے اس کے قبضے سے پانچ چوری شدہ موٹر سائیکلیں برآمد کر لیں۔ ملزم نے دورانِ تفتیش مختلف علاقوں سے موٹر سائیکلیں چوری کرنے کا اعتراف کیا، جس کے بعد برآمد شدہ موٹر سائیکلیں قانونی کارروائی مکمل ہونے پر اصل مالکان کے حوالے کر دی گئیں۔دریں اثنا تھانہ بی سیکشن پولیس نے کارروائی کے دوران عادی ملزم علی نواز مینگھار بلوچ کو گرفتار کرکے اس کے قبضے سے ایک غیر قانونی پستول اور زندہ گولیاں برآمد کر لیں، جبکہ تھانہ کھڈہر پولیس نے قتل اور اقدامِ قتل کے مقدمے میں مطلوب روپوش ملزم عجب عرف ڈاڈو ملاح کو گرفتار کر لیا۔ ادھر تھانہ لاکھاٹ پولیس نے مقدمہ نمبر 11/2026 میں مطلوب روپوش ملزم خادم حسین مہر کو گرفتار کرکے مزید تفتیش شروع کر دی ہے۔