سزی نگر:بھارت نے ہرصورت حریت پسند رہنما یاسین ملک کو سزائے موت دینے کی ٹھان لی، نرس کے قتل کے الزام میں مقبوضہ کشمیر کی استبدادی پولیس فورس نے 35 برس بعد چارج شیٹ فائل کردی
مقبوضہ جموں و کشمیر پولیس کی اسٹیٹ انویسٹی گیشن ایجنسی (SIA) نے 35 برس بعد کشمیری پنڈت نرس – سرلا بھٹ – کے اغوا اور قتل کیس میں یاسین ملک اور اس کے چار ساتھیوں کو ملزم قرار دیتے ہوئے سرینگر کی خصوصی عدالت میں چارج شیٹ فائل کر دی ہے۔
تفصیلی چارج شیٹ میں ملزمان پر اغوا، غیر قانونی طور پر روکنے، قتل، ثبوت مٹانے، مجرمانہ سازش، دہشت گردی اور تخریبی سرگرمیوں، اور غیر قانونی اسلحہ رکھنے سمیت مختلف دفعات کے تحت الزامات عائد کیے گئے ہیں۔
ایجنسی کی تحقیقات کے مطابق، دہلی کی انتہائی محفوظ تہاڑ جیل میں عمر قید کی سزا کاٹ رہے محمد یاسین ملک کے علاوہ حریت پسند تنظیم جے کے ایل ایف کے سابق سربراہ عبدالحمید شیخ، غلام محمد پتلو اور محمد یوسف عرف ادریس بھی اس اغوا اور قتل کی منصوبہ بندی اور اس پر عمل درآمد میں شامل تھے۔ عبدالحمید شیخ اور محمد یوسف عرف ادریس 1990 کی دہائی میں مارے گئے تھے، جبکہ غلام محمد پتلو کا 2018 میں طبعی موت سے انتقال ہو اتھا۔
پانچویں ملزم خورشید احمد چالکو کے بارے میں الزام لگایا گیا ہے کہ وہ پاکستان جا چکا ہے۔ یادرہے یاسین ملک 2019سے جیل میں بند ہیں۔
سرلا بھٹ نامی نرس کو 18 اپریل 1990 کو سرینگر کے صورہ علاقے میں واقع شیر کشمیر انسٹی ٹیوٹ آف میڈیکل سائنسز (SKIMS) کے ہاسٹل سے اغوا کیا تھا۔ اگلے روز ان کی گولیوں سے چھلنی لاش اسپتال سے چند کلومیٹر دور ملی تھی۔ لاش کے ساتھ ایک پرچی بھی ملی تھی، جس میں اسے "مخبر” قرار دیا گیا تھا۔
اس واقعے کے بعد نگین پولیس اسٹیشن میں مقدمہ درج کیا گیا تھا، تاہم اس وقت ملزمان کا سراغ نہیں مل سکا۔ بعد میں 2023 میں پولیس نے کیس دوبارہ کھولا اور دہشت گردانہ سازش کی حقیقت سامنے لانے کے لیے اسے ایس آئی اے کے سپرد کر دیا۔
سال 2025 میں ایس آئی اے نے یاسین ملک کے سرینگر کے مائسومہ میں واقع گھر سمیت آٹھ مقامات پر چھاپے مارے تھےیاد رہے کہ یاسین ملک کو دہلی کی ایک عدالت نے دہشت گردی کی مالی معاونت کے ایک مقدمے میں مجرم قرار دیتے ہوئے عمر قید کی سزا سنائی تھی، اور وہ اس وقت تہاڑ جیل میں سزا کاٹ رہے ہیں اور این آئی اے نے یاسین ملک کی عمر قید کی سزا کو پھانسی میں بدلنے کا مطالبہ کیا ہے جس پر کورٹ میں سماعت جاری ہے۔
بھارت نے ہرصورت حریت پسند رہنما یاسین ملک کو سزائے موت دینے کی ٹھان لی، 35 برس پرانے نرس قتل کیس میں چارج شیٹ فائل
