ملتان ڈویژن( بیورو چیف ملک جابر عباس سے)
پیٹرولیم مصنوعات کی قیمتوں میں نمایاں کمی کے باوجود پبلک ٹرانسپورٹ کے کرایوں میں کمی نہ ہونے پر شہریوں نے شدید تشویش کا اظہار کرتے ہوئے حکومت اور متعلقہ اداروں سے فوری نوٹس لینے کا مطالبہ کیا ہے۔
شہریوں کا کہنا ہے کہ جب بھی پیٹرول اور ڈیزل کی قیمتوں میں اضافہ ہوتا ہے تو ٹرانسپورٹرز فوراً کرایوں میں اضافہ کر دیتے ہیں، لیکن قیمتوں میں کمی کے باوجود مسافروں سے بدستور پرانے اور زائد کرائے وصول کیے جا رہے ہیں، جس سے عوام کو حکومتی ریلیف کا کوئی فائدہ نہیں پہنچ رہا۔
روزانہ سفر کرنے والے مزدور، سرکاری و نجی ملازمین، طلبہ اور تاجر برادری کا کہنا ہے کہ مہنگائی پہلے ہی ان کی زندگیوں کو متاثر کر رہی ہے، ایسے میں ٹرانسپورٹ کرایوں میں کمی سے عام آدمی کو کچھ ریلیف مل سکتا ہے۔
شہریوں نے ریجنل ٹرانسپورٹ اتھارٹی، ضلعی انتظامیہ اور متعلقہ محکموں سے مطالبہ کیا ہے کہ پبلک ٹرانسپورٹ کے موجودہ کرایوں کا ازسرنو جائزہ لیا جائے اور پیٹرولیم مصنوعات کی نئی قیمتوں کے مطابق کرایہ ناموں پر نظرثانی کرکے فوری طور پر نئے نرخ جاری کیے جائیں۔
عوامی حلقوں کا کہنا ہے کہ بعض ٹرانسپورٹرز انتظامی نگرانی کی کمی کا فائدہ اٹھاتے ہوئے من مانی کرایہ وصول کر رہے ہیں، جس سے مسافروں پر اضافی مالی بوجھ پڑ رہا ہے۔ شہریوں نے امید ظاہر کی کہ حکومت عوامی مفاد کو مقدم رکھتے ہوئے مؤثر اقدامات کرے گی تاکہ پیٹرولیم مصنوعات کی قیمتوں میں کمی کا حقیقی فائدہ عام لوگوں تک پہنچ سکے اور انہیں مہنگائی کے بوجھ سے کچھ ریلیف مل سکے۔