لیبیا کے لیفٹیننٹ جنرل صدام خلیفہ حفتر کی جی ایچ کیو آمد، آرمی چیف فیلڈ مارشل عاصم منیر سے ملاقات

راولپنڈی:لیبیا کی عرب مسلح افواج کے ڈپٹی کمانڈر انچیف لیفٹیننٹ جنرل صدام خلیفہ حفتر نے جی ایچ کیو راولپنڈی کا دورہ کیا، جہاں انہوں نے چیف آف آرمی اسٹاف فیلڈ مارشل سید عاصم منیر سے ملاقات کی۔
جی ایچ کیو پہنچنے پر لیبیائی وفد کا شاندار استقبال کیا گیا، جہاں انہیں مسلح افواج کے چاق و چوبند دستے نے گارڈ آف آنر پیش کیا۔
ملاقات کے دوران دونوں رہنماؤں نے باہمی دلچسپی کے امور، علاقائی سیکیورٹی کی بدلتی ہوئی حرکیات (Dynamics)، دفاعی تعاون اور عسکری سطح پر اشتراکِ عمل کو مزید فروغ دینے کے طریقوں پر تفصیلی تبادلہ خیال کیا۔ دونوں اطراف نے اس بات پر اتفاق کیا کہ پاک-لیبیا دفاعی تعلقات کو مستحکم کرنا اور پیشہ ورانہ عسکری تربیت و سیکیورٹی کے شعبوں میں تعاون کو وسیع کرنا وقت کی اہم ضرورت ہے۔
ملاقات کے موقع پر فیلڈ مارشل سید عاصم منیر نے اس بات پر زور دیا کہ پاکستان آرمی دوست ممالک کے ساتھ امن، استحکام اور تعمیری روابط کے فروغ کے لیے پرعزم ہے۔ انہوں نے کہا کہ پاکستان خطے میں قیامِ امن کے لیے اپنی ذمہ داریاں نبھانے کے لیے ہمہ وقت تیار ہے۔
لیبیا کے ڈپٹی کمانڈر انچیف نے پاکستان کی مسلح افواج کی پیشہ ورانہ مہارتوں کو سراہتے ہوئے علاقائی امن و امان کے قیام میں پاکستان کے کلیدی کردار کا اعتراف کیا۔ انہوں نے پاک فوج کی قربانیوں اور نظم و ضبط کی بھی تعریف کی۔