پنجاب حکومت نے تیسرا سرپلس بجٹ دے کر ریکارڈ قائم کر دیا: عظمیٰ بخاری

لاہور: وزیر اطلاعات پنجاب عظمیٰ بخاری نے کہا ہے کہ پنجاب حکومت نے مسلسل تیسرا سرپلس بجٹ پیش کر کے ایک نئی تاریخ رقم کی ہے۔ ان کا کہنا ہے کہ مریم نواز کی قیادت میں صوبائی ترقی کا سفر اٹک سے وہاڑی اور رحیم یار خان تک یکساں طور پر پھیل چکا ہے۔
ایک بیان میں عظمیٰ بخاری نے کہا کہ پنجاب کا ترقیاتی بجٹ اب صرف کاغذوں تک محدود نہیں بلکہ گراؤنڈ پر عملی طور پر نظر آ رہا ہے۔ انہوں نے کہا کہ صحت، تعلیم اور سماجی شعبوں کو خصوصی ترجیح دی گئی ہے، جبکہ کسانوں کو بجٹ میں سب سے زیادہ ریلیف فراہم کیا گیا ہے۔ انہوں نے اعادہ کیا کہ ‘اپنی چھت اپنا گھر’، ‘ستھرا پنجاب’ اور ‘آسان کاروبار’ جیسے تاریخی منصوبے پوری رفتار سے جاری رہیں گے۔
وزیر اطلاعات نے اعلان کیا کہ الیکٹرک بسوں کا نیٹ ورک صوبے کی 147 تحصیلوں تک پھیلایا جائے گا۔ انہوں نے مزید کہا کہ پنجاب کے تمام اضلاع میں ترقی کے یکساں مواقع فراہم کیے جا رہے ہیں تاکہ کسی بھی علاقے کو نظر انداز نہ کیا جائے۔
عظمیٰ بخاری نے کہا کہ مریم نواز نے اپنے دو سالہ دورِ حکومت میں گزشتہ برسوں کی محرومیوں کا ازالہ کر دیا ہے۔ انہوں نے دعویٰ کیا کہ سیاسی شعبدہ بازی اور دھرنوں کی سیاست کے مقابلے میں ‘خدمت کی سیاست’ کامیاب ہوئی ہے، اور اسی طرزِ حکمرانی کی بدولت عوام میں مریم نواز کی مقبولیت کا گراف مسلسل بلند ہو رہا ہے۔
انہوں نے بات کا اختتام کرتے ہوئے کہا کہ پنجاب اپنے وسائل کے بل بوتے پر تمام تر ترقیاتی منصوبوں کو اسی رفتار سے مکمل کرے گا تاکہ صوبے کو ایک جدید اور خوشحال خطہ بنایا جا سکے