ایوان صدرمیں وزیراعظم شہباز شریف کی صدر آصف زرداری سے ملاقات،قومی سلامتی، داخلی و علاقائی صورتحال سمیت اہم قومی امور پر تفصیلی تبادلۂ خیال

اسلام آباد: صدر آصف علی زرداری سے وزیرِ اعظم محمد شہباز شریف نے ایوانِ صدر میں ملاقات کی، جس میں قومی سلامتی، داخلی و علاقائی صورتحال سمیت اہم قومی امور پر تفصیلی تبادلۂ خیال کیا گیا۔ صدرِ مملکت نے وفاقی بجٹ میں عوامی فلاح، صوبوں کے حقوق اور معاشی استحکام کو ترجیح دینے پر زور دیا۔
ملاقات میں نائب وزیرِ اعظم و وزیرِ خارجہ اسحاق ڈار، وزیرِ داخلہ محسن نقوی، وزیرِ قانون اعظم نذیر تارڑ، وزیرِ خزانہ محمد اورنگزیب اور وزیرِ اعظم کے مشیر برائے سیاسی امور رانا ثناء اللہ بھی شریک تھے۔
ملاقات میں ملکی معیشت، آئندہ مالی سال کے وفاقی بجٹ، گلگت بلتستان کے حالیہ انتخابات، آزاد جموں و کشمیر کی صورتحال، امن و امان اور دیگر قومی اہمیت کے معاملات پر غور کیا گیا۔
بجٹ تجاویز اور عوامی ریلیف سے متعلق گفتگو کرتے ہوئے صدرِ مملکت نے وفاقی بجٹ میں عوامی فلاح، صوبوں کے حقوق اور معاشی استحکام کو ترجیح دینے پر زور دیا۔صدرآصف علی زرداری نے ہدایت کی کہ آنے والے بجٹ میں شرحِ ترقی اور عوامی فلاح کی سکیموں کو ہم آہنگ کرنے کی پوری کوشش کی جائے۔
ملاقات کے دوران وزیرِ داخلہ محسن نقوی نے صدرِ مملکت کو اپنے حالیہ دورۂ ایران اور علاقائی سطح پر ہونے والے سفارتی رابطوں کے بارے میں تفصیلی بریفنگ بھی دی۔
ملاقات میں سینیٹر شیری رحمان، رکن قومی اسمبلی سید نوید قمر، سینیٹر سلیم مانڈوی والا اور سینیٹر احد چیمہ بھی شریک ہوئے۔علاوہ ازیں چیئرمین پاکستان پیپلز پارٹی بلاول بھٹو زرداری، وزیرِ اعلیٰ سندھ سید مراد علی شاہ، وزیرِ اعظم آزاد جموں و کشمیر راجہ فیصل راٹھور، اور رکن قومی اسمبلی راجہ پرویز اشرف نے بھی اجلاس میں شرکت کی۔