اسکردو:گلگت بلتستان اسمبلی کے انتخابات میں ووٹوں کی گنتی کا عمل جاری ہے جبکہ غیر حتمی اور غیر سرکاری نتائج موصول ہونے کا سلسلہ بھی جاری ہے۔ اب تک 7 حلقوں کے مکمل نتائج سامنے آ چکے ہیں جن میں پاکستان پیپلز پارٹی نے 4 نشستوں پر کامیابی حاصل کر کے برتری حاصل کر لی ہے، جبکہ مسلم لیگ (ن) ایک اور آزاد امیدواروں نے 2 نشستیں اپنے نام کر لی ہیں۔ مکمل نتائج کے مطابق جی بی اے 4 نگر، جی بی اے 5 نگر، جی بی اے 7 اسکردو اور جی بی اے 11 کھرمنگ میں پاکستان پیپلز پارٹی کے امیدوار کامیاب قرار پائے۔ جی بی اے 22 گانچھے میں مسلم لیگ (ن) کے محمد ابراہیم ثنائی نے کامیابی حاصل کی، جبکہ جی بی اے 23 اور جی بی اے 24 گانچھے سے آزاد امیدوار انور علی اور اسد شفیق میدان مارنے میں کامیاب رہے۔
دیگر کئی حلقوں میں ووٹوں کی گنتی جاری ہے جہاں پیپلز پارٹی، مسلم لیگ (ن)، استحکام پاکستان پارٹی اور آزاد امیدواروں کے درمیان سخت مقابلہ دیکھنے میں آ رہا ہے۔ 24 جنرل نشستوں کے لیے ہونے والے انتخابات میں 8 خواتین سمیت مجموعی طور پر 403 امیدوار میدان میں ہیں۔ 9 لاکھ 63 ہزار سے زائد رجسٹرڈ ووٹرز نے اپنا حق رائے دہی استعمال کیا۔ انتخابات کے دوران ووٹرز کی بڑی تعداد نے پولنگ اسٹیشنوں کا رخ کیا جبکہ مجموعی طور پر امن و امان کی صورتحال تسلی بخش رہی۔
الیکشن کمیشن کے مطابق گلگت بلتستان بھر میں 1391 پولنگ اسٹیشن قائم کیے گئے تھے جن میں 349 حساس اور 551 انتہائی حساس قرار دیے گئے تھے۔ حتمی نتائج کے اعلان تک مختلف حلقوں سے غیر سرکاری نتائج موصول ہونے کا سلسلہ جاری ہے۔
گلگت بلتستان انتخابات: ابتدائی نتائج میں پیپلز پارٹی کو برتری، 7 حلقوں کے نتائج مکمل
