یوٹیوبر ندیم مبارک عرف نانی والا کے خلاف مقدمہ درج، گرفتار کرلیا گیا

لاہور: معروف یوٹیوبر ندیم مبارک عرف "نانی والا” کے خلاف تھانہ ڈیفنس سی میں مقدمہ درج کرکے انہیں گرفتارکر لیا گیا ہے۔ پولیس نے مقدمہ غفلت اور لاپرواہی سے ڈرائیونگ، سرکاری امور میں مداخلت اور دیگر متعلقہ دفعات کے تحت درج کیا ہے۔

پولیس کے مطابق مقدمہ ٹریفک پولیس اہلکار فہد الرحمٰن کی مدعیت میں درج کیا گیا۔ ایف آئی آر میں مؤقف اختیار کیا گیا ہے کہ کالے شیشوں والی غیر رجسٹرڈ گاڑی کو چیکنگ کے دوران رکنے کا اشارہ کیا گیا، تاہم ڈرائیور نے گاڑی روکنے کے بجائے تیز رفتاری کا مظاہرہ کرتے ہوئے ون وے پر گاڑی دوڑا دی۔
پولیس رپورٹ کے مطابق ٹریفک اہلکاروں نے گاڑی کا تعاقب کیا تو ڈرائیور نے مبینہ طور پر گاڑی سے ٹکر مارنے کی کوشش بھی کی۔ بعد ازاں ملزم نے گاڑی ڈیفنس فیز 7 میں واقع اپنے گھر کے باہر کھڑی کر دی۔
ایف آئی آر میں مزید الزام عائد کیا گیا ہے کہ ندیم مبارک عرف نانی والا نے آن ڈیوٹی ٹریفک پولیس اہلکاروں کو دھمکیاں دیں اور سرکاری فرائض کی انجام دہی میں رکاوٹ ڈالنے کی کوشش کی۔
پولیس کا کہنا ہے کہ مقدمہ درج کرکے قانونی کارروائی کا آغاز کر دیا گیا ہے جبکہ واقعے کے مختلف پہلوؤں کی تحقیقات جاری ہیں۔