مشرق وسطیٰ پر جنگ کے بادل، تیل کی عالمی قیمتوں میں پھر اضافہ ہوگیا

لندن+ریاض:عالمی منڈی میں تیل کی قیمتوں میں دوبارہ اضافہ دیکھنے میں آیا ہے جہاں برینٹ خام تیل کی قیمت 95 ڈالر فی بیرل سے تجاوز کر گئی جبکہ یو ایس ویسٹ ٹیکساس انٹرمیڈیٹ کی ٹریڈنگ میں بھی بڑھتے رجحان کا سامنا رہا۔
یہ اضافہ حزب اللہ کی جانب سے لبنان میں جنگ بندی کی نئی پیشکش مسترد کیے جانے اور عمان کے ایک آئل ٹرمینل پر دھماکے کے بعد تیل کی لوڈنگ معطل ہونے کی اطلاعات کے بعد سامنے آیا ہے۔
ماہرین کے مطابق مشرق وسطیٰ میں بڑھتی کشیدگی، امریکہ ایران مذاکرات میں تعطل، اور آبنائے ہرمز میں تیل بردار جہازوں کی محدود آمدورفت کے باعث یہ اضافہ ہو رہا ہے جبکہ عمان کے ایک آئل ٹرمینل پر دھماکے کے بعد لوڈنگ رکنے کی اطلاعات نے بھی قیمتیں بڑھنے کی ایک وجہ قرار دی جا رہی ہے۔