شیخوپورہ (رپورٹ اسامہ طفیل) تھانہ کوٹ عبدالمالک کی حدود میں مبینہ پولیس مقابلے اور کراس فائرنگ کے دوران 30 سے زائد وارداتوں میں ملوث ریکارڈ یافتہ ملزم زخمی حالت میں گرفتار کر لیا گیا جبکہ اس کے دو ساتھی فرار ہونے میں کامیاب ہو گئے۔پولیس کے مطابق واقعہ اس وقت پیش آیا جب تین نامعلوم موٹر سائیکل سوار شہریوں سے موبائل فون اور پرس چھین کر فرار ہو رہے تھے۔ اطلاع ملنے پر پولیس نے ناکوں پر سخت چیکنگ شروع کی اور مشکوک موٹر سائیکل سواروں کو رکنے کا اشارہ کیا، تاہم ملزمان نے رکنے کے بجائے پولیس پارٹی پر فائرنگ کر دی اور فرار ہونے کی کوشش کی۔پولیس نے فوری تعاقب کیا جس کے دوران ملزمان اور پولیس کے درمیان فائرنگ کا تبادلہ ہوا۔ فائرنگ کے اختتام پر سرچ آپریشن کیا گیا تو ایک ملزم زخمی حالت میں پایا گیا جسے فوری طور پر اسپتال منتقل کر دیا گیا۔پولیس کے مطابق گرفتار ہونے والا ملزم اصغر علی ہے جو 30 سے زائد سنگین وارداتوں میں ریکارڈ یافتہ اور پولیس کو مطلوب تھا۔ موقع سے پستول اور گولیاں بھی برآمد ہوئیں۔ فرار ہونے والے دو ملزمان کی تلاش کے لیے علاقے میں سرچ آپریشن جاری ہے جبکہ پولیس مزید تفتیش کر رہی ہے۔
کوٹ عبدالمالک میں پولیس مقابلہ، 30 سے زائد وارداتوں میں مطلوب ریکارڈ یافتہ ملزم زخمی، دوساتھی فرار
