دربار عالیہ منیند شریف میں سائیں محبوب صابریؒ کا سالانہ عرس عقیدت و احترام سے جاری

مری/کہوٹہ (راشد مغل سے)کہوٹہ دربار عالیہ منیند شریف میں حضرت سائیں محبوب علی صابریؒ کا سالانہ عرس مبارک نہایت شان و شوکت، عقیدت اور مذہبی جوش و جذبے کے ساتھ منایا جا رہا ہے۔ عرس کے موقع پر درود و سلام کی روح پرور محافل، قوالی، ذکر و اذکار اور لنگرِ عام کا سلسلہ جاری ہے جہاں عقیدت مندوں کی بڑی تعداد شرکت کر رہی ہے۔اس موقع پر حافظ غلام مرتضیٰ صابری کھڈیوٹ ڈالی لے کر دربار عالیہ پہنچے۔ راستوں میں عاشقانِ رسول ﷺ کی جانب سے درود و سلام اور نعرۂ رسالتؐ کی صداؤں سے فضا گونجتی رہی۔ دربار منیند شریف پہنچنے پر سائیں زہد حسین صابری نے معزز مہمانوں اور زائرین کا پرتپاک استقبال کیا۔عرس کی مرکزی محفل میں درود و سلام پیش کیا گیا جبکہ خصوصی دعا بھی کروائی گئی۔ دعا میں ملک پاکستان کی سلامتی، ترقی، استحکام، افواجِ پاکستان، شہداء اور غازیوں کے بلند درجات کے لیے خصوصی دعائیں مانگی گئیں۔ معرکۂ حق کے ایک سال مکمل ہونے کے موقع پر وطن عزیز کی بقا اور امن کے لیے بھی خصوصی دعا کی گئی۔عرس مبارک میں مختلف علاقوں سے آنے والے عقیدت مندوں نے بھرپور شرکت کی اور روحانی محفلوں سے فیض یاب ہوتے رہے۔