جھڈو(رپورٹ / قیصر راجہ راجپوت سے )
جھڈو کے گورنمنٹ گرلز اسکول میں مبینہ طور پر گندا پانی پینے سے دو معصوم طالبات کے جاں بحق ہونے کے افسوسناک واقعے کے خلاف سجا ار تحریک کی جانب سے ایاز کھوسو، ممتاز جونیجو، رحیم کلوئی اور ایڈووکیٹ ممتاز کھوسو کی قیادت میں درجنوں بچوں کے ہمراہ عوامی نگر پاڑے سے احتجاجی ریلی نکالی گئی، جو مین اسٹیشن روڈ پہنچ کر احتجاجی مظاہرے میں تبدیل ہوگئی، جہاں شدید نعرے بازی کی گئی۔مقررین نے خطاب کرتے ہوئے کہا کہ چند روز قبل اسکول میں مبینہ طور پر گندا اور زہریلا پانی پینے کے باعث 8 سالہ حفصہ ٹالپر اور 13 سالہ نرگس سیال جاں بحق ہوگئیں، جبکہ کئی دیگر طالبات کے بیمار ہونے کی اطلاعات بھی سامنے آئی ہیں۔انہوں نے الزام عائد کیا کہ اسکول انتظامیہ اصل حقائق چھپانے کی کوشش کر رہی ہے، جبکہ محکمہ تعلیم کی جانب سے قائم کی گئی تحقیقاتی کمیٹی پر بھی انہیں کوئی اعتماد نہیں۔رہنماں نے مطالبہ کیا کہ واقعے کی شفاف اور غیرجانبدار عدالتی انکوائری کرائی جائے اور غفلت کے ذمہ دار اسکول انتظامیہ اور متعلقہ افسران کے خلاف سخت قانونی کارروائی عمل میں لائی جائے۔انہوں نے مزید کہا کہ پہلے جامعات سے طلبہ کی لاشیں ملنے کے واقعات سامنے آتے تھے، مگر اب پرائمری اسکولوں میں بھی معصوم بچے محفوظ نہیں رہے، جو نہایت افسوسناک اور ناقابل برداشت صورتحال ہے۔مظاہرین نے حکومت، محکمہ تعلیم اور انسانی حقوق کے اداروں سے مطالبہ کیا کہ معاملے کا فوری نوٹس لے کر متاثرہ خاندانوں کو انصاف فراہم کیا جائے اور اسکولوں میں صاف پانی سمیت بنیادی سہولیات کی فراہمی یقینی بنائی جائے۔