کراچی کے بل بورڈز پر ’اشتہاری جنگ‘: شان فوڈز کے دعوے پر فلک فوڈز کا ایسا کرارا جواب کہ ہر کوئی دنگ رہ گیا!

کراچی :مارکیٹنگ کی دنیا میں ایک دوسرے کو نیچا دکھانے کے بجائے اپنی انفرادیت ثابت کرنا ایک فن ہے، اور یہی فن کراچی کے ایک بل بورڈ پر واضح طور پر نظر آ رہا ہے۔
پاکستان کے مشہور مصالحہ برانڈ ’شان فوڈز‘ نے اپنی اشتہاری مہم کا آغاز ایک جارحانہ اعداد و شمار کے ساتھ کیا۔ بل بورڈ پر درج تحریر کے مطابق:
"کراچی میں 10 میں سے 9 لوگوں کا انتخاب شان ہے”۔
اس اشتہار کے ذریعے شان فوڈز نے مارکیٹ پر اپنی اجارہ داری اور عوامی پسندیدگی کو ثابت کرنے کی کوشش کی۔
جہاں شان فوڈز نے اکثریت کی بات کی، وہیں حریف کمپنی ’فلک فوڈز‘ نے اسی بل بورڈ کے بالکل برابر میں اپنا اشتہار لگا کر اس دعوے کو اپنے حق میں استعمال کر لیا۔ فلک فوڈز نے روایتی راستے سے ہٹ کر ان لوگوں کو ہدف بنایا جو کچھ الگ کرنا چاہتے ہیں۔ ان کا نعرہ تھا:
"10 میں سے 1 بنو، کچھ نیا ٹرائی کرو”۔
فلک فوڈز نے اپنے اشتہار میں انگریزی میں بھی یہی پیغام دہرایا کہ فلک کے ساتھ کچھ نیا آزما کر اس ایک منفرد شخص میں شامل ہوں جو بھیڑ کا حصہ نہیں۔
اس طرح کے جوابی اشتہارات اور شاندار ردعمل اشتہاری صنعت میں بہت کم دیکھنے کو ملتے ہیں۔ ماہرینِ مارکیٹنگ اسے ایک بہترین حکمتِ عملی قرار دے رہے ہیں کیونکہ فلک فوڈز نے شان کے اشتہار کی موجودگی کا فائدہ اٹھاتے ہوئے اسے اپنے برانڈ کے لیے ’انوکھا‘ ہونے کا جواز بنا دیا۔
سوشل میڈیا پر اس تصویر کے وائرل ہوتے ہی صارفین نے جہاں شان فوڈز کی مقبولیت کو تسلیم کیا، وہیں فلک فوڈز کی حاضر دماغی اور جرات مندانہ مارکیٹنگ کو بھی خوب سراہا ہے۔ اب دیکھنا یہ ہے کہ کیا شان فوڈز اس ’10 میں سے 1‘ والے جملے کا کوئی نیا جواب لاتا ہے یا یہ اشتہاری جنگ یہیں ختم ہو جائے گی۔