امرتسر:انڈین پنجاب سے تعلق رکھنے والے مقتول گلوکار و سیاست دان سدھو موسے والا کے گانے کا ٹیزر ریلیز ہوتے ہی دو منٹ میں سپر ہٹ ہو گیا۔
ٹریبیون انڈیا کے مطابق اس گانے کا طویل عرصے سے انتظار کیا جا رہا تھا۔
سدھو موسے والا کی ٹیم نے جمعے کی صبح ’آئیز آن می‘ کا ٹیزر مختلف سوشل میڈیا پلیٹ فارمز پر جاری کیا۔
رپورٹ میں بتایا گیا ہے کہ اس گانے کے بارے میں توقع کی جا رہی ہے کہ یہ ان کے قتل اور اس سے قبل ان کو ختم کرنے کے لیے ہونے والی مبینہ سازشوں سے متعلق ہے۔ گانے کے ٹیزر نے ریلیز ہوتے ہی منٹوں میں سوشل میڈیا پر ہلچل مچا دی اور بہت بڑی تعداد میں اس کو صارفین نے دیکھا۔
آفیشل انسٹاگرام اکاؤنٹ پر اس کو صرف دو منٹ کے دوران 15 ہزار لائیکس ملے جبکہ یوٹیوب چینل پر اس کو دو منٹ میں ہی اس کو ایک لاکھ 20 ہزار مرتبہ دیکھا گیا۔
اردو نیوز کی رپورٹ کے مطابق 34 سیکنڈ پر مشتمل اس ٹیزر میں سدھو موسے والا کو ایکشن سے بھرپور انداز میں دکھایا گیا ہے۔آغاز ایک نقاب پوش شخص سے ہوتا ہے، جس کے ہاتھ میں پستول ہے اور وہ اس کو پنجاب کے نقشے پر مانسا ضلع کے اوپر رکھتا ہے، اس کے بعد سدھو موسے والا ایک جیپ چلاتے دکھائی دیتے ہیں اور پھر جب کچھ لوگ ان کا راستہ روکنے اور ہتھیار تاننے کی کوشش کرتے ہیں تو وہ اے کے رائفل سے فائرنگ کرتے نظر آتے ہیں۔
ٹیز میں ایک شعر بھی سنائی دیتا ہے ’منڈا بلیک کیٹ تیری، تیرے گولی مروا دو گی۔‘
قابل ذکر بات یہ بھی ہے کہ موسے والا کی پچھلی میوزک ویڈیو بھی دنیا بھر میں سب سے زیادہ دیکھی جانے والی دوسری ویڈیو بنی، جس پر ایک کروڑ سے زائد لوگوں نے کمنٹس کیے۔
سدھو موسے والا کے قتل کے بعد سے ان کی ٹیم اب تک ان کے 12 گانے ریلیز کر چکی ہے جن میں سے ہر ایک کو بہت زیادہ توجہ ملی ہے۔
سدھو موسے والا کا ہولوگرام پر مبنی ورلڈ ٹور جس کا عنوان ہے ’سائنڈ ٹو ورلڈ ٹور‘ ہے، کے بارے میں امید ظاہر کی جا رہی ہے کہ اس کا اعلان بھی جلد کر دیا جائے گا۔اس ٹور میں ہولوگرام ٹیکنالوجی کا استعمال کیا جائے گا تاکہ پروجیکشن تھری ڈی ٹیکنالوجی کے ذریعے دنیا بھر کے شائقین کے لیے ان کو سٹیج پر دوبارہ لایا جائے۔
توقع کی جا رہی ہے کہ اس ٹور میں امریکہ، کینیڈا، برطانیہ، متحدہ عرب امارات، آسٹریلیا اور نیوزی لینڈ سمیت آٹھ ممالک شامل ہوں گے۔
مرنے کے بعد سدھو موسے والا کا ریکارڈ، نئے ٹیزر کے 2 منٹ میں ایک لاکھ 20 ہزار ویوز
