کوئٹہ :بلوچستان کے علاقے یکمچ میں سیکیورٹی فورسز نے خفیہ اطلاعات کی بنیاد پر بروقت کارروائی کرتے ہوئےفضائی کاروائی میں فتنہ الہندوستان کے خارجیوں پر آرمڈ کواڈکوپٹر سے کاری ضرب، 5 خارجی جہنم واصل ہوگئے۔
سیکیورٹی ذرائع کے مطابق یہ کارروائی اس وقت عمل میں لائی گئی جب انٹیلیجنس اداروں کو علاقے میں فتنہ الہندوستان کے دہشتگردوں کی موجودگی کی مصدقہ اطلاع ملی۔دہشتگرد کسی بڑی کارروائی کی منصوبہ بندی کر رہے تھے تاہم فورسز نے پیشگی کارروائی کرتے ہوئے ان کے عزائم کو ناکام بنا دیا۔ آپریشن کے دوران جدید ٹیکنالوجی کا استعمال کیا گیا اور آرمڈ کواڈکوپٹر کے ذریعے فضائی نگرانی کے بعد ٹھیک ٹھیک نشانہ لگایا گیا جس سے دہشتگردوں کو بھاری نقصان پہنچا۔ کارروائی انتہائی مہارت اور پیشہ ورانہ انداز میں انجام دی گئی تاکہ شہری آبادی کو کسی قسم کا نقصان نہ پہنچے۔
ہلاک ہونے والے تمام افراد ریاست دشمن سرگرمیوں میں ملوث تھے اور مختلف علاقوں میں تخریب کاری کی کارروائیوں میں بھی مطلوب تھے۔ واقعے کے بعد علاقے میں کلیئرنس آپریشن بھی شروع کر دیا گیا ہے تاکہ ممکنہ طور پر چھپے ہوئے دیگر عناصر کو بھی گرفتار یا ختم کیا جا سکے۔
