برصغیرکی ایک اور سریلی آواز ہمیشہ کے لئے خاموش،آشا بھوسلے چل بسیں

ممبئی: معروف بالی ووڈ معروف پلے بیک گلوکارہ آشا بھوسلے اتوار کو انتقال کر گئیں۔ وہ کچھ دنوں سے بیمار تھیں اور انہیں سنیچر کو ممبئی کے کینڈی بریچ اسپتال میں داخل کرایا گیا تھا۔ انہوں نے 92 برس کی عمر میں اس دنیائے فانی کو الوداع کہا۔
آشا بھوسلے کے بیٹے آنند بھوسلے نے ان کے انتقال کی تصدیق کی۔ انہوں نے کہا کہ "میری والدہ کا آج انتقال ہو گیا۔ لوگ کل صبح 11 بجے لوئر پریل کے کاسا گرانڈے میں ان کا آخری دیدار کر سکتے ہیں، جہاں وہ رہتی تھیں۔ ان کی آخری رسومات پیر کو سہ پہر چار بجے شیواجی پارک میں ادا کی جائیں گی۔”
آشا بھوسلے کا انتقال بھارتی فلم انڈسٹری کے لیے ایک بڑا نقصان ہے۔ ان کے انتقال کی خبر سے بالی ووڈ میں ماتم کا ماحول چھا گیا ہے۔ دنیا بھر میں پھیلے ان کے مداح اور فنکار صدمے میں ہیں۔ آشا بھوسلے نے اپنی سریلی آواز سے دنیا بھر میں موسیقی کی دنیا میں انمٹ نقوش چھوڑے اور کئی دہائیوں تک شائقین کے دلوں پر راج کیا۔
اس سے قبل ہفتے کے روز ان کی پوتی جنائی نے انسٹاگرام پر ایک پوسٹ میں ان کی صحت کے بارے میں جانکاری دیتے ہوئے لکھا کہ "آشا تائی کو انتہائی تھکاوٹ اور سینے میں انفیکشن کی وجہ سے ہسپتال میں داخل کرایا گیا تھا۔”
آشا بھوسلے آنجہانی لیجنڈری گلوکارہ لتا منگیشکر کی چھوٹی بہن تھیں۔ انہوں نے مختلف بھارتی زبانوں میں 12,000 سے زیادہ گانے ریکارڈ کیے ہیں اور کئی معروف اداکاراؤں کو اپنی آواز دی ہے، جن میں پدمنی اور وجینتی مالا جیسی جنوبی بھارت کی اداکاراؤں سے لے کر مینا کماری، مدھوبالا، زینت امان، کاجول اور ارمیلا ماتونڈکر وغیرہ شامل ہیں۔
بھوسلے کے کچھ مشہور گانوں میں "چرا لیا ہے تم نے جو دل کو”، "ابھی نہ جاؤ چھوڑکر” اور "انتہا ہو گئی انتظار کی” جیسے متعدد گانے شامل ہیں۔ سال 2023 میں انہوں نے اپنی سالگرہ منانے کے لیے دبئی میں منعقد ایک خصوصی کنسرٹ "Asha90: Live in Concert” میں پرفارم کیا تھا۔ انہیں راشٹریہ پرسکار، فلم فیئر ایوارڈ، دادا صاحب پھالکے ایوارڈ، اور پدم وبھوشن جیسے باوقار اعزازات سے نوازا گیا۔ ۔ پیر کی شام چار بجے شیواجی پارک میں پورے سرکاری اعزاز کے ساتھ ان کی آخری رسومات ادا کی جائیں گی۔