ٹرمپ کے الٹی میٹم کے بعد ایران کا اسرائیل اور کویت پر بڑا حملہ؛ امریکی جاسوس ڈرون تباہ، کویتی پاور،واٹر پلانٹس ملبے میں تبدیل

    تہران+کویت+تل ابیب :ایران نے امریکی صدر ڈونلڈ ٹرمپ کی جانب سے معاہدے کے لیے دی گئی مہلت کے ایک دن بعد اتوار کی صبح اسرائیل اور کویت پر میزائل اور ڈرون حملے کیے ہیں۔


    خبر رساں ایجنسی کے مطابق کویت اور اسرائیل نے کہا ہے کہ ان کے دفاعی نظام ایران کے نئے حملوں کا جواب دے رہے ہیں۔ امریکہ کے صدر ڈونلڈ ٹرمپ نے سنیچر کو کہا تھا کہ ایران کے پاس آبنائے ہُرمز کھولنے سے متعلق معاہدہ کرنے کے لیے 48 گھنٹے باقی ہیں، ورنہ ’قیامت ٹُوٹ پڑے گی۔‘
    ایران کی مرکزی فوجی قیادت نے صدر ٹرمپ کی اس دھمکی کو مسترد کر دیا اور جنرل علی عبداللہی علی آبادی نے اس (دھمکی) کو ’بے بس، گھبرائی ہوئی، غیر متوازن اور احمقانہ بات‘ قرار دیا۔
    انہوں نے صدر ٹرمپ کے الفاظ دہراتے ہوئے خبردار کیا کہ ’آپ کے لیے جہنم کے دروازے کھل جائیں گے۔‘
    بعدازاں، ڈونلڈ ٹرمپ نے ایک ویڈیو شیئر کی جس میں رات کے اندھیرے میں آسمان کو دھماکوں سے روشن دکھایا گیا تھا۔اس ویڈیو کے ساتھ انہوں نے لکھا کہ: ’ایران کے کئی فوجی رہنماؤں کو ہلاک کر دیا گیا ہے اور تہران میں اس بڑے حملے کے دوران بہت کچھ تباہ کیا گیا ہے تاہم انہوں نے یہ نہیں بتایا کہ یہ واقعہ کب پیش آیا۔
    کویت کی حکومت نے تصدیق کی ہے کہ ایران کی جانب سے کیے گئے ڈرون حملوں کی وجہ سے دو پاور پلانٹس، وزارت تیل کی عمارت اور پانی صاف کرنے والے کارخانے کو نقصان پہنچا ہے۔
    اس سے قبل ایرانی حملوں کے باعث ایک سرکاری دفتر کے کمپیکس کو نقصان پہنچا تھا جبکہ کویت کی وزارت تیل کے دفتر میں بھی آگ لگ گئی تھی۔
    اسرائیل نے بھی تصدیق کی ہے کہ ایران کی طرف سے میزائل داغے گئے تھے، لیکن فوج نے انھیں روک دیا ہے۔
    ایران کے پاسداران انقلاب نے اصفہان میں ایک ایم-کیو 9 جاسوس ڈرون طیارہ گرانے کا دعویٰ کیا ہے۔
    بیان میں کہا گیا ہے کہ ڈرون کو ’آئی آر جی سی کے جدید ایرو سپیس ڈیفنس سسٹم اور ایران کے مربوط فضائی دفاعی نیٹ ورک کے ذریعے مار گرایا گیا ہے۔دو روز پہلے بھی آئی جی آر سی نے اصفہان میں ہی دو MQ9 ڈرون مار گرانے کا دعویٰ کیا تھا۔

    Related Posts