قصور:قصور کے ایک علاقے میں پیش آنے والے انسانیت سوز واقعے نے شہریوں کو ہلا کر رکھ دیا، جہاں یکے بعد دیگرے تین معصوم بچیوں کو درندگی کا نشانہ بنایا گیا۔ ملزم نے جرم چھپانے کی کوشش میں ایک بچی کو گندے نالے میں پھینک دیا، تاہم قانون نافذ کرنے والے اداروں کی فوری کارروائی نے کیس کو منطقی انجام تک پہنچا دیا۔
اطلاع ملتے ہی کرائم کنٹرول ڈیپارٹمنٹ (سی سی ڈی) قصور کے سربراہ ڈی ایس پی عتیق ڈوگر کی مختلف ٹیمیں جائے وقوعہ اور ارد گرد علاقوں میں شواہد کے حصول کے لئے پہنچ گئیں اور شواہد اکٹھے کرتے ہوئے تحقیقات شروع کر دیں ڈسٹرکٹ آفیسر سی سی ڈی عتیق ڈوگر کی نگرانی میں علاقے کو گھیرے میں لے کر سرچ آپریشن شروع کیا گیا۔
ذرائع کے مطابق تفتیش کے دوران ایک کلومیٹر کے دائرے میں واقع 275 گھروں، فیکٹریوں اور حویلیوں کی مکمل چھان بین کی گئی، جبکہ 670 افراد کی جانچ پڑتال اور 610 سے تفصیلی پوچھ گچھ کی گئی۔ اس کے علاوہ 83 مشتبہ افراد کے ڈی این اے ٹیسٹ بھی کروائے گئے، جس سے تحقیقات کو سائنسی بنیادوں پر آگے بڑھایا گیا۔
سی سی ٹی وی فوٹیجز کا باریک بینی سے جائزہ لینے کے دوران ایک مشتبہ شخص کی عدم موجودگی نے تفتیش کا رخ موڑ دیا۔ اسی بنیاد پر ملزم تک رسائی حاصل کی گئی۔
پولیس کے مطابق ملزم طارق ولد شفیع، سکنہ سیالانوالی کھنگریانوالا، کو جدید ٹیکنالوجی اور مسلسل نگرانی کے ذریعے گرفتار کیا گیا۔ دوران تفتیش اس نے انکشاف کیا کہ وہ اس سے قبل بھی تین کمسن بچیوں کو نشانہ بنا چکا ہے۔ ڈی این اے رپورٹس اور موبائل فون لوکیشن (سی ڈی آر) نے اس کے جرائم کی تصدیق کی، جبکہ متاثرہ بچیوں نے بھی ملزم کی شناخت کر لی۔ پولیس حکام کے مطابق ملزم کو ریمانڈ پر لیا گیا تھا، تاہم جائے وقوعہ کی نشاندہی کے دوران اس کے ساتھیوں کی فائرنگ سے وہ ہلاک ہو گیا۔
واقعے کے بعد متاثرہ خاندان شدید صدمے سے دوچار ہیں، تاہم سی سی ڈی کی فوری اور پیشہ ورانہ کارروائی پر اہل علاقہ نے اطمینان کا اظہار کیا ہے۔