اسلام آباد :وزیرِ اعظم محمد شہباز شریف کی زیر صدارت وڈیو لنک اجلاس میں امیر طبقے کی لگژری گاڑیوں میں استعمال ہونے والے ہائی آکٹین فیول پر اہم فیصلہ کیا گیا ہے۔
وزیراعظم نے اجلاس میں نوٹس لیا کہ مہنگی ترین گاڑیوں میں استعمال ہونے والے ہائی آکٹین فیول پر موجودہ لیوی 100 روپے فی لیٹر سے بڑھا کر 300 روپے فی لیٹر کی جائے۔
اس فیصلے کے بعد لگژری گاڑیوں میں ڈلنے والے ہائی آکٹین فیول پر اب سے 300 روپے فی لیٹر لیوی لاگو ہو گی۔
وزیراعظم کے مطابق اس اقدام سے حکومت کو ماہانہ 9 ارب روپے کی بچت ہو گی، جس کا فائدہ عوام کو ریلیف کی صورت میں دیا جائے گا۔ نچلے اور درمیانے طبقے کے زیر استعمال عام گاڑیوں کے ایندھن کی قیمتیں نہیں بڑھائی گئی، جبکہ صرف لگژری گاڑیوں میں استعمال ہونے والے ہائی آکٹین فیول کی قیمت میں اضافہ کیا گیا ہے۔
وزیراعظم نے کہا کہ اس فیصلے سے معیشت پر بوجھ کم ہوگا اور ملک کا امیر طبقہ اس کا حصہ اٹھائے گا۔ پبلک ٹرانسپورٹ اور ہوائی جہازوں کے کرایوں میں کوئی اضافہ نہیں ہو گا۔
اجلاس میں وفاقی وزیر خزانہ و محصولات محمد اورنگزیب، وفاقی وزیر اطلاعات و نشریات عطاء اللہ تارڑ، وزیر پیٹرولیم و قدرتی وسائل علی پرویز ملک اور دیگر اعلی سرکاری افسران نے شرکت کی۔
وزیراعظم کی کفایت شعاری پالیسی، لگژری گاڑیوں کے ہائی آکٹین فیول پر لیوی 300 روپے فی لیٹر کی منظوری دے دی گئی
