گرینڈ آپریشن جاری: پنجاب سے 32 ہزار سے زائد غیر قانونی غیر ملکی باشندے ملک بدر

لاہور:(ملک ظہیر) حکومتِ پنجاب کی ہدایت پر صوبہ بھر میں غیر قانونی طور پر مقیم غیر ملکی باشندوں کے خلاف کریک ڈاؤن اور ان کی واپسی کا سلسلہ پوری شدت سے جاری ہے۔ آئی جی پنجاب عبدالکریم نے پولیس کو ہدایت دی ہے کہ صوبے کے چپے چپے سے غیر قانونی مقیم افراد کا انخلا ہر صورت یقینی بنایا جائے۔
ترجمان پنجاب پولیس کی جانب سے جاری کردہ رپورٹ کے مطابق اب تک مجموعی طور پر 32 ہزار 729 غیر قانونی غیر ملکیوں کو ڈی پورٹ کیا جا چکا ہے، جن میں افغان باشندوں کی بڑی تعداد شامل ہے۔
ملک بدر کیے گئے افراد میں 12,356 مرد، 6,673 خواتین اور 13,700 بچے شامل ہیں۔
ڈی پورٹ کیے جانے والوں میں 10,441 افراد رہائشی ثبوت رکھتے تھے، 11,098 کے پاس افغان سٹیزن کارڈ تھے، جبکہ 11,190 افراد مکمل طور پر غیر قانونی طور پر مقیم تھے۔
ترجمان کے مطابق اس وقت بھی 346 غیر قانونی مقیم افراد مختلف ہولڈنگ پوائنٹس پر موجود ہیں، جنہیں قانونی کاغذی کارروائی مکمل ہونے کے بعد سرحد پار روانہ کر دیا جائے گا۔
آئی جی پنجاب عبدالکریم نے واضح کیا کہ پنجاب پولیس بین الاقوامی قوانین اور ریاست کی پالیسی کے تحت انخلا کے عمل کو مینیج کر رہی ہے۔ انہوں نے تمام اضلاع کے سربراہان کو حکم دیا کہ:
"سیکیورٹی کو ہائی الرٹ رکھا جائے اور اس بات کو یقینی بنایا جائے کہ کوئی بھی غیر قانونی مقیم شخص ریاست کی نظروں سے اوجھل نہ رہے۔”
پنجاب پولیس کے مطابق یہ مہم اس وقت تک جاری رہے گی جب تک صوبے سے تمام غیر رجسٹرڈ اور غیر قانونی غیر ملکیوں کا مکمل صفایا نہیں ہو جاتا۔