کویت میں امریکی جنگی طیاروں کی تباہی: ایران کا امریکا سے مذاکرات کا دو ٹوک انکار، قبرص میں برطانوی فوجی اڈے پر ڈرون حملہ

کویت +قبرض+واشنگٹن:کویت کی وزارت دفاع کا کہنا ہے کہ ’پیر کی صبح متعدد امریکی جنگی طیارے گِر کر تباہ ہوئے ہیں‘ اور اُن پر سوار پائلٹس محفوظ رہے ہیں۔ دوسری جانب ایران کی جوابی کارروائیوں کا سلسلہ جاری ہے اور پیر کے روز اسرائیل اور خلیجی شہروں بشمول دبئی، ابوظہبی، دوحہ اور کویت پر میزائل اور ڈرونز داغے گئے ہیں جبکہ ایرانی رہنما علی لاریجانی نے مذاکرات کی اطلاعات کو مسترد کیا ہے۔
قبرص کے صدر نکوس کرسٹوڈولائیڈس کا کہنا ہے کہ جنوبی قبرص میں برطانوی فوجی اڈے پر ایرانی ڈرون حملہ کیا گیا۔
ان کے مطابق دیر رات کے وقت ایران کے بغیر پائلٹ والے شاہد ڈرون نے ایکروتیری میں فوجی اڈے کو نشانہ بنایا جس میں معمولی نقصان ہوا۔
کویت کی وزارت دفاع کا کہنا ہے کہ پیر کی صبح ملک میں متعدد امریکی جنگی طیارے گِر کر تباہ ہوئے ہیں۔
اس کا کہنا ہے کہ جہازوں کے عملے کو کوئی نقصان نہیں پہنچا اور انھیں طبی معائنے کے لیے ہسپتال منتقل کیا گیا ہے۔
کویتی وزارت دفاع کا کہنا ہے کہ اس کی جانب سے اپنے امریکی اتحادی سے طیارے گِرنے کی وجوہات کے حوالے سے تعاون کیا جا رہا ہے۔
اس کے مطابق طیارے گِرنے کی وجوہات کے بارے میں تحقیقات جاری ہیں۔
امریکی چینل سی این این کے مطابق گذشتہ روز کویت میں واقع علی السلیم ہوائی اڈے کے قریب ایف 15 جنگی طیارہ گِر کر تباہ ہوا تھا۔
ایران کی سپریم نیشنل سکیورٹی کونسل کے سیکرٹری علی لاریجانی نے ان اطلاعات کو مسترد کر دیا ہے کہ ان کا ملک امریکا کے ساتھ مذاکرات کرنا چاہتا ہے۔
امریکی اخبار وال سٹریٹ جرنل کی ایک رپورٹ میں کہا گیا تھا کہ ایران ’عمان کی ثالثی میں امریکا کے ساتھ مذاکرات دوبارہ شروع کرنا چاہتا ہے۔‘ اس حوالے سے علی لاریجانی نے سوشل میڈیا پر اپنے ایکس اکاؤنٹ پر لکھا: ’ہم امریکا کے ساتھ مذاکرات نہیں کریں گے۔‘
اس سے قبل امریکی صدر ڈونلڈ ٹرمپ نے دی اٹلانٹک سے بات کرتے ہوئے کہا تھا کہ تہران نے مذاکرات دوبارہ شروع کرنے کے لیے آمادگی کے آثار ظاہر کیے ہیں۔
ڈونلڈ ٹرمپ نے کہا کہ ’وہ بات کرنا چاہتے ہیں اور میں بات کرنے پر راضی ہو گیا ہوں، اس لیے میں ان سے بات کروں گا۔ انھیں یہ کام جلد کرنا چاہیے تھا۔‘