وائلڈ لائف ڈیپارٹمنٹ کی ‘دبنگ’ افسر رضوانہ عزیز کا ایکشن: غیر قانونی شکاریوں، اسمگلروں کے گرد گھیرا تنگ،5شکاری گرفتار

راولپنڈی :سیکرٹری جنگلات و جنگلی حیات پنجاب کیپٹن (ر) طاہر ظفر عباسی کی ہدایت پر صوبہ بھر میں جنگلی حیات کے تحفظ کے لیے مؤثر اقدامات جاری ہیں، جہاں چیف وائلڈلائف رینجر کیپٹن (ر) محمد وسیم کی قیادت میں پنجاب وائلڈ لائف ڈیپارٹمنٹ بلاامتیاز کارروائیاں عمل میں لا رہا ہے۔
ان کارروائیوں میں پنجاب کی دبنگ اسسٹنٹ چیف وائلڈلائف رینجر ضلع راولپنڈی رضوانہ عزیز نمایاں کردار کے ساتھ سامنے آئیں، جنہوں نے اپنی پیشہ ورانہ مہارت اور جرات کا مظاہرہ کرتے ہوئے تحصیل راولپنڈی میں کتوں کے ذریعے جنگلی سور اور خرگوش کے غیرقانونی شکار میں ملوث پانچ شکاریوں کو گرفتار کیا
ملزمان کے خلاف کارروائی کرتے ہوئے ڈیڑھ لاکھ روپے جرمانہ عائد کرکے کیس نمٹا دیا گیا۔ رضوانہ عزیز نے ایک اور کامیاب کارروائی میں سوشل میڈیا کے ذریعے تیتر کی غیرقانونی تجارت میں ملوث دو ملزمان کو گرفتار کیا اور ان کے قبضے سے 25 زندہ بھورے تیتر برآمد کیے۔ ملزمان کو 80 ہزار روپے جرمانہ کیا گیا جبکہ برآمد شدہ تیتر قدرتی ماحول میں آزاد کر دیے گئے۔ دوسری جانب ضلع اٹک میں وائلڈلائف کی ٹیم نے تحصیل پنڈی گھیپ کے علاقے میں پری چارجڈ نیومیٹک (پی سی پی) ایئر گن کے ذریعے جنگلی کبوتر کا شکار کرنے والے ایک شخص کو رنگے ہاتھوں گرفتار کیا اور ایک لاکھ روپے جرمانہ عائد کرکے کیس نمٹا دیا۔