اسلام آباد، جرائم پیشہ عناصر کے خلاف بڑا کریک ڈاؤن، 103 ملزمان گرفتار

اسلام آباد:رپورٹ (ایاز خان)
اسلام آباد آئی جی اسلام آباد علی ناصر رضوی کے وژن “کرائم فری اسلام آباد” کے تحت وفاقی دارالحکومت میں جرائم پیشہ عناصر کے خلاف بھرپور کارروائیاں جاری ہیں۔ گزشتہ 48 گھنٹوں کے دوران اسلام آباد پولیس نے مختلف علاقوں میں کامیاب کریک ڈاؤن کرتے ہوئے مجموعی طور پر 103 ملزمان کو گرفتار کر لیا۔ پولیس کے مطابق گرفتار ہونے والوں میں 74 سابقہ ریکارڈ یافتہ اشتہاری مجرمان بھی شامل ہیں، جو مختلف سنگین جرائم میں مطلوب تھے۔ کارروائیوں کے دوران غیر قانونی اسلحہ رکھنے، اسلحہ کی نمائش اور منشیات فروشی میں ملوث مزید 29 ملزمان کو بھی حراست میں لیا گیا۔
منشیات فروشوں کے خلاف بلا امتیاز کارروائیوں کے نتیجے میں 19 ملزمان گرفتار کیے گئے، جن کے قبضے سے 3 کلو گرام چرس، 3 کلو گرام سے زائد ہیروئن، 1450 گرام آئس اور 15 بوتل شراب برآمد کی گئی۔ اسی طرح غیر قانونی اسلحہ رکھنے میں ملوث 10 ملزمان کو گرفتار کر کے ان کے قبضے سے مختلف بور کے 9 پستول، ایک رائفل اور بڑی مقدار میں ایمونیشن بھی برآمد کیا گیا۔ ڈی آئی جی اسلام آباد محمد جواد طارق نے کہا ہے کہ اسلام آباد پولیس جرائم کے مکمل خاتمے اور شہریوں کے جان و مال کے تحفظ کے لیے زیرو ٹالرنس پالیسی پر عمل پیرا ہے، اور اس سلسلے میں بلا تعطل کارروائیاں جاری رہیں گی۔