راولپنڈی: سوشل میڈیا پر ان دنوں ایک ایسی شادی کے چرچے ہیں جس نے عمر کے فرق سے متعلق روایتی سوچ کو چیلنج کر دیا ہے۔ راولپنڈی کے 60 سالہ حکیم بابر کی 23 سالہ خاتون سے شادی جہاں عوامی توجہ کا مرکز بنی ہوئی ہے، وہی اس جوڑے نے اب خاموشی توڑتے ہوئے منفی تبصرے کرنے والوں کو آئینہ دکھا دیا ہے۔
سوشل میڈیا پر وائرل ہونے والی ویڈیو میں حکیم بابر نے اپنی دلہن کے ہمراہ گفتگو کرتے ہوئے بتایا کہ ان کی شادی ‘ارینج’ بھی ہے اور ‘لو میرج’ بھی۔ ان کا کہنا تھا کہ ہم نے پہلے ایک دوسرے کو پسند کیا اور پھر باقاعدہ خاندان کی رضامندی سے رشتہ ازدواج میں منسلک ہوئے۔
عمر کے فرق پر ہونے والی تنقید کا جواب دیتے ہوئے حکیم بابر نے دو ٹوک الفاظ میں کہا:
"عمر محض ایک ہندسہ ہے، اصل چیز انسان کا دل ہے جو جوان ہونا چاہیے۔”
انہوں نے مزید کہا کہ ان کی اہلیہ طلاق یافتہ تھیں اور ان سے نکاح کر کے انہوں نے سنتِ نبوی ﷺ پر عمل کیا ہے۔ ان کا موقف تھا کہ معاشرے کو اس اقدام کی پذیرائی کرنی چاہیے تھی۔ حکیم بابر نے سخت لہجہ اختیار کرتے ہوئے کہا کہ تنقید وہی لوگ کر رہے ہیں جو نکاح جیسے پاکیزہ بندھن کے بجائے ناجائز تعلقات کو ترجیح دیتے ہیں۔
سوشل میڈیا پر ردعمل
اس وائرل جوڑے کی ویڈیو سامنے آنے کے بعد انٹرنیٹ صارفین کی بڑی تعداد ان کے دفاع میں سامنے آئی ہے۔ مداحوں کا کہنا ہے کہ نکاح کرنا گناہ نہیں بلکہ ایک قابلِ تقلید عمل ہے، جبکہ کچھ صارفین نے اسے ‘محبت کی کوئی عمر نہیں ہوتی’ کی بہترین مثال قرار دیا ہے۔