بےنقاب رپورٹ:حکومتِ پنجاب نے انتظامی امور میں مبینہ غفلت اور نااہلی پر بڑا قدم اٹھاتے ہوئے اسسٹنٹ کمشنر ذوالفقار علی خان کو فوری طور پر معطل کر دیا ہے۔ یہ کارروائی PEEDA ایکٹ 2006 کے تحت عمل میں لائی گئی۔
جاری کردہ نوٹیفکیشن کے مطابق افسر کے خلاف بدانتظامی اور اختیارات کے مبینہ ناجائز استعمال کی شکایات سامنے آئی تھیں، جس پر حکومت نے زیرو ٹالرنس پالیسی اپناتے ہوئے فوری ایکشن لیا۔ متعلقہ حکام کو ہدایت دی گئی ہے کہ مکمل اور شفاف انکوائری کر کے جلد از جلد چارج شیٹ پیش کی جائے تاکہ ذمہ داروں کا تعین کیا جا سکے۔
حکومتی ذرائع کے مطابق شہریوں کے ساتھ بدسلوکی، اختیارات کا غلط استعمال یا فرائض میں غفلت کسی صورت برداشت نہیں کی جائے گی۔ حکام کا کہنا ہے کہ سرکاری افسران کی کارکردگی پر کڑی نظر رکھی جا رہی ہے اور قانون کے مطابق بلاامتیاز کارروائی جاری رہے گی۔
یہ اقدام اس بات کا واضح اشارہ ہے کہ صوبائی حکومت انتظامی شفافیت اور عوامی خدمت کے معیار پر کوئی سمجھوتہ کرنے کو تیار نہیں۔