کراچی :کراچی کےعلاقہ سولجر بازار کی رہائشی عمارت میں گیس لیکیج کے باعث دھماکہ ہونے سے 2 بچوں سمیت 16 افراد جاں بحق اور متعدد زخمی ہوگئے۔ تفصیلات کے مطابق یہ واقعہ صبح 4 بجے کے قریب اس وقت پیش آیا جب عمارت میں گیس لیکج کے باعث دھماکہ ہوگیا جس کے نتیجے میں عمارت کا کچھ حصہ گرگیا، حادثے کی اطلاع ملتے ہی پولیس نے علاقے کو گھیرے میں لے کر سکیورٹی سخت کردی اور ریسکیو اداروں نے سرچ آپریشن شروع کردیا، متاثرہ عمارت تین منزلہ ہے جس کے ہرفلور پر ایک کمرہ قائم ہے، تنگ گلیوں کی وجہ سے ریسکیو آپریشن میں مشکلات کا سامنا کرنا پڑا۔
ریسکیو حکام نے بتایا کہ گیس دھماکہ عمارت کی پہلی منزل پر ہوا اور ممکنہ طور پر یہ دھماکہ گیس سلنڈر یا گیس کھینچنے والی مشین کے پھٹنے سے ہوا، جائے حادثہ پر امدادی کارروائیاں جاری ہیں جہاں سے اب تک 13 لا شیں نکالی جاچکی ہیں جن میں 2 بچے بھی شامل ہیں، واقعے میں 14 سے زائد زخمی ہیں جنہیں طبی امداد کے لیے ہسپتال منتقل کردیا گیا، مزید افراد کے ملبے تلے دبے ہونے کا خدشہ ہے جس کے لیے ریسکیو آپریشن جاری ہے۔
دھماکے سے متعلق عینی شاہدین نے بتایا کہ عمارت کے گراؤنڈ فلور پر سلنڈر دھماکہ ہوا، دھماکے کی شدت اتنی زیادہ تھی کہ آس پاس کی عمارتیں بھی اس سے لرز گئیں اور علاقے میں خوف و ہراس پھیل گیا جب کہ گرنے والی عمارت کے ملبے میں مزید افراد کے پھنسے ہونے کا خدشہ ہے، دھماکے کی شدت کی وجہ سے عمارت متاثر ہوئی اور زمین بوس ہوگئی، تنگ گلیوں کی وجہ سے ریسکیو آپریشن میں مشکلات کا سامنا کرنا پڑا۔
کراچی،سولجر بازار میں سلنڈر دھماکے سے رہائشی عمارت تباہ، دو بچوں سمیت16 افراد ہلاک
