لاہور:(رپورٹ ملک ظہیر)
کاؤنٹر ٹیررازم ڈیپارٹمنٹ پنجاب نے صوبہ بھر میں ایک ماہ کے دوران انٹیلی جنس بنیادوں پر بھرپور کارروائیاں کرتے ہوئے مختلف کالعدم تنظیموں سے تعلق رکھنے والے 26 دہشت گرد گرفتار کر کے دہشت گردی کا ایک بڑا منصوبہ ناکام بنا دیا۔ ترجمان کے مطابق یہ کارروائیاں پنجاب کے مختلف اضلاع میں کی گئیں، جن کا مقصد کسی بھی ممکنہ ناخوشگوار واقعے سے قبل ریاست دشمن عناصر کا قلع قمع کرنا تھا۔
سی ٹی ڈی کے مطابق مجموعی طور پر 286 انٹیلی جنس بیسڈ آپریشنز کیے گئے، جن میں 286 مشتبہ افراد سے تفتیش کے بعد 26 دہشت گردوں کو اسلحہ، بھاری مقدار میں دھماکہ خیز مواد اور ممنوعہ لٹریچر سمیت گرفتار کیا گیا۔ سرگودھا سے فتنہ الخوارج سے تعلق رکھنے والے چار خطرناک دہشت گردوں کی گرفتاری کو کارروائیوں میں اہم پیش رفت قرار دیا جا رہا ہے، جن کے قبضے سے بھاری برودی مواد اور اسلحہ برآمد ہوا۔
گرفتار دہشت گردوں میں عرفان، ضامن علی، مجاہد علی، فیصل، شیراز، نعمت اللہ، اسامہ، غلام یاسین اور یاسر سمیت دیگر شامل ہیں۔ ان عناصر کا تعلق لاہور، ساہیوال، خوشاب، میاںوالی، بھکر، فیصل آباد، جھنگ، چکوال، راجن پور، نارووال اور پاکپتن سے بتایا گیا ہے۔
کارروائیوں کے دوران دہشت گردوں کے قبضے سے 4935 گرام دھماکہ خیز مواد، 19 ڈیٹونیٹرز، 34 فٹ سیفٹی فیوز وائر، تین آئی ای ڈی بم، کالعدم تنظیموں کے پمفلٹس و میگزین، پرائمہ کارڈز، موبائل فونز اور نقدی برآمد کی گئی۔ ترجمان نے انکشاف کیا کہ دہشت گرد مختلف شہروں میں اہم عمارتوں کو نشانہ بنانے کی منصوبہ بندی کر چکے تھے، تاہم بروقت کارروائی سے یہ عزائم خاک میں ملا دیے گئے۔
سی ٹی ڈی نے گرفتار عناصر کے خلاف 25 مقدمات درج کر کے مزید تفتیش شروع کر دی ہے تاکہ نیٹ ورک کے دیگر سہولت کاروں تک بھی رسائی حاصل کی جا سکے۔ اس کے ساتھ ساتھ مقامی پولیس اور سیکیورٹی اداروں کے تعاون سے 4662 کومبنگ آپریشنز کیے گئے، جن میں 160,009 افراد کی چیکنگ، 538 مشتبہ افراد کی گرفتاری، 516 مقدمات کا اندراج اور 389 بازیابیاں عمل میں آئیں۔