لاہور کی ’سیف بسنت‘ کامیاب، پاکستانیوں نے انتشار کی سیاست مسترد کر دی: وزیر اطلاعات عظمیٰ بخاری

لاہور : وزیر اطلاعات پنجاب عظمیٰ بخاری نے بسنت فیسٹیول کے کامیاب اور محفوظ انعقاد پر لاہوریوں، پاکستانیوں اور سمندر پار پاکستانیوں سمیت غیر ملکی مہمانوں کا شکریہ ادا کیا ہے۔ اپنے ایک تہنیتی بیان میں انہوں نے کہا کہ لاہور کی روایتی بسنت کو محفوظ طریقے سے منانے پر یہاں کے شہری مبارکباد کے مستحق ہیں۔
صوبائی وزیر نے بسنت کو محفوظ بنانے میں پولیس، ریسکیو 1122، ضلعی انتظامیہ اور دیگر متعلقہ اداروں کی محنت کو سراہا۔ ۔
عظمیٰ بخاری نے واضح کیا کہ "بسنت کا مقررہ وقت اب ختم ہو چکا ہے اور اب مزید پتنگ بازی کی ہرگز اجازت نہیں ہے۔” انہوں نے والدین کو سخت ہدایت کی کہ وہ اپنے بچوں پر نظر رکھیں، کیونکہ اب کسی بھی قسم کی پتنگ بازی پر قانون حرکت میں آئے گا اور سخت ترین ایکشن لیا جائے گا۔
عظمیٰ بخاری نے کہا کہ پاکستانی عوام نے نفرت، انتشار اور احتجاج کی سیاست کو مکمل طور پر مسترد کر دیا ہے۔ انہوں نے کہا کہ عوام نے مریم نواز کے ترقی، خوشحالی اور امن کے وژن کو ووٹ دیا اور سپورٹ کیا ہے۔ ان کا مزید کہنا تھا کہ ملک کو کمزور کرنے والے اب اپنے انجام کو پہنچ چکے ہیں۔