لاہور : لاہور کا تاریخی علاقہ دہلی گیٹ اس وقت عالمی توجہ کا مرکز بن گیا جب قائمقام امریکی سفیر نیٹلی بیکر بسنت کی روایتی خوشیوں میں شریک ہونے کے لیے وہاں پہنچیں۔ انہوں نے پیلے رنگ کا لباس زیب تن کر رکھا تھا، جو شرکاء اور لاہوریوں کی توجہ کا مرکز بنا رہا۔
دہلی گیٹ آمد پر پنجاب کی وزیر اطلاعات عظمیٰ بخاری نے نیٹلی بیکر کا پرتپاک استقبال کیا۔ اس موقع پر سینئر صوبائی وزیر مریم اورنگزیب اور صوبائی وزیر صہیب بھرتھ بھی ان کے ہمراہ موجود تھے، جنہوں نے معزز مہمان کو لاہور کی ثقافت اور بسنت کی تاریخ کے بارے میں آگاہ کیا۔
امریکی قائمقام سفیر کے ہمراہ ایک اعلیٰ سطحی وفد بھی موجود تھا جس میں امریکی ڈپٹی اسسٹنٹ سیکرٹری جان مارک، قونصل جنرل سٹیٹسن سینڈرز، صدف سعد، پولیٹیکل آفیسر جان سکیری اور سعد سرفراز شامل تھے۔
قائمقام امریکی سفیر نیٹلی بیکر نے اس موقع پر گفتگو کرتے ہوئے محفوظ بسنت کے انعقاد اور اس قدیم تہوار کی بحالی پر پنجاب حکومت کا شکریہ ادا کیا۔ انہوں نے کہا کہ لاہور کی ثقافت اور یہاں کے لوگوں کا جوش و خروش بے مثال ہے۔ میزبانوں کی جانب سے امریکی وفد کی تواضع لاہور کے روایتی اور لذیذ کھانوں سے کی گئی، جسے مہمانوں نے بے حد پسند کیا۔