امریکا ،سعودی عرب ، ترکی سمیت عالمی برادری کی بلوچستان دہشت گردانہ حملوں کی شدید مذمت، پاکستان سے اظہار یکجہتی

اسلام آباد: بلوچستان میں حالیہ دہشت گرد حملوں کے خلاف عالمی برادری نے سخت ردِعمل دیتے ہوئے ان کی بھرپور مذمت کی ہے۔
سعودی عرب اور قطر نے حملوں کی شدید الفاظ میں مذمت کرتے ہوئے متاثرہ خاندانوں سے دلی تعزیت اور زخمیوں کی جلد صحتیابی کے لیے نیک تمناؤں کا اظہار کیا ہے۔ برطانیہ نے بھی بلوچستان کے مختلف علاقوں میں ہونے والے دہشت گرد حملوں کی مذمت کرتے ہوئے پاکستان کے ساتھ یکجہتی کا اظہار کیا اور متاثرین کے اہل خانہ سے تعزیت کی ہے۔
ترکیہ نے دہشت گرد حملوں کو قابلِ نفرت قرار دیتے ہوئے شدید مذمت کی اور ہر قسم کی دہشت گردی کے خلاف جدوجہد میں برادر ملک پاکستان کی مسلسل حمایت کے عزم کا اعادہ کیا۔
پاکستان میں امریکی ناظم الامور نیٹلی بیکر نے بھی بلوچستان میں دہشت گردوں کے بزدلانہ حملوں کی سخت مذمت کرتے ہوئے متاثرین اور ان کے اہل خانہ سے دلی ہمدردی اور تعزیت کا اظہار کیا۔ ان کا کہنا ہے کہ امریکہ امن و استحکام کے قیام کے لیے پاکستان کے ساتھ ایک مضبوط شراکت دار کے طور پر کھڑا ہے اور اس مشکل وقت میں پاکستان کے ساتھ مکمل یکجہتی کا اظہار کرتا ہے۔
نیٹلی بیکر نے دہشت گردی کے متاثرین، ان کے اہل خانہ اور اس واقعے سے متاثر ہونے والے تمام افراد سے دلی ہمدردی اور تعزیت کا اظہار کیا۔سعودی عرب کی وزارت خارجہ نے گذشتہ روز بلوچستان کے مختلف علاقوں میں دہشتگردانہ حملوں کی شدید مذمت کی ہے۔
سعودی عرب کی وزارت خارجہ نے بلوچستان میں دہشت گردانہ واقعات کی شدید مذمت کرتے ہوئے کہا کہ وہ ہر قسم کی دہشت گردی اور انتہاپسندی کو یکسر مسترد کرتے ہیں۔ دہشت گردانہ حملوں پر گہری تشویش و افسوس کا اظہار کیا گیا۔