سیالکوٹ پولیس کی بڑی کامیابی: 40 لاکھ روپے کی چوری کا معمہ حل، ملزم گرفتار

سیالکوٹ(سلیم احمد اعوان شیخو)
تھانہ حاجی پورہ پولیس نے پیشہ ورانہ مہارت اور جدید ٹیکنالوجی کا استعمال کرتے ہوئے گھر میں ہونے والی 40 لاکھ روپے کی بڑی چوری کی واردات کا معمہ حل کر لیا ہے۔ پولیس نے نہ صرف ملزم کو گرفتار کیا بلکہ چوری شدہ رقم برآمد کر کے اصل مالک کے حوالے کر دی ہے۔
واقعے کی سنگینی کا نوٹس لیتے ہوئے ڈی پی او سیالکوٹ، کیپٹن (ر) دوست محمد نے ڈی ایس پی سٹی سرکل کو فوری طور پر ملزم کی گرفتاری اور مال کی برآمدگی کا ٹاسک سونپا تھا۔
ایس ایچ او تھانہ حاجی پورہ انسپکٹر میاں عبدالرازق نے اپنی ٹیم کے ہمراہ کارروائی کا آغاز کیا۔پولیس نے سی سی ٹی وی کیمروں، ہیومن انٹیلیجنس اور جدید سائنسی تفتیشی طریقوں کو بروئے کار لاتے ہوئے قلیل وقت میں ملزم کا سراغ لگایا۔
پولیس نے کامیاب کارروائی کے دوران ملزم علی حسن (سکنہ سمبڑیال) کو ٹریس کر کے گرفتار کر لیا۔ ملزم کے قبضے سے چوری شدہ تمام رقم یعنی 40 لاکھ روپے برآمد کر لیے گئے۔ متاثرہ شہری نے اپنی جمع پونجی واپس ملنے پر پولیس ٹیم کا تہہ دل سے شکریہ ادا کیا۔
ڈی پی او دوست محمد نے پولیس ٹیم کی کارکردگی کو سراہتے ہوئے کہا کہ عوام کے جان و مال کا تحفظ ہماری اولین ترجیح ہے۔ انہوں نے شہریوں سے بھی اپیل کی کہ وہ اپنے گردونواح میں کسی بھی مشکوک سرگرمی کی اطلاع فوری طور پر پولیس کو دیں تاکہ جرائم کا جڑ سے خاتمہ کیا جا سکے۔