لاہور (ملک ظہیر کی رپورٹ)
وزیراعلیٰ پنجاب مریم نواز شریف کی ہدایات پر عوامی تفریح کے پیشِ نظر پتنگ بازی کو تین روز کے لیے مشروط طور پر کھولے جانے کے فیصلے کے بعد انویسٹی گیشن ونگ کے اعلیٰ افسران بھی حفاظتی اقدامات کے لیے متحرک ہو گئے ہیں۔ اسی سلسلے میں ڈی آئی جی انویسٹی گیشن سید ذیشان رضا اور ایس ایس پی انویسٹی گیشن محمد نوید کی جانب سے موٹر سائیکلوں پر سیفٹی راڈ لگانے کی تقریب منعقد کی گئی۔
تقریب میں تمام ڈویژنل ایس پیز انویسٹی گیشن سمیت دیگر افسران نے شرکت کی، جہاں شہریوں کو پتنگ بازی کے دوران حفاظتی اقدامات کی اہمیت سے آگاہ کیا گیا۔ ڈی آئی جی انویسٹی گیشن سید ذیشان رضا نے واضح کیا کہ حکومتی ہدایات کی خلاف ورزی پر جرمانے اور قانونی کارروائی عمل میں لائی جائے گی۔ ان کا کہنا تھا کہ ذمہ دار شہری ہونے کا ثبوت دیں اور محفوظ پتنگ بازی کو فروغ دیں، کیونکہ انسانی جان کا تحفظ اولین ترجیح ہے۔
ڈی آئی جی انویسٹی گیشن نے زور دیا کہ کوئی بھی موٹر سائیکل سوار سیفٹی راڈ کے بغیر گھر سے باہر نہ نکلے، جبکہ خطرناک اور دھاتی ڈور کا استعمال مکمل طور پر ممنوع ہے۔ انہوں نے کہا کہ پتنگ بازی کا شوق ضرور پورا کریں مگر طے شدہ حفاظتی اصولوں کے دائرے میں رہتے ہوئے، کیونکہ آپ کی معمولی احتیاط کسی قیمتی جان کو بچا سکتی ہے۔ اس موقع پر ایس ایس پی انویسٹی گیشن محمد نوید نے والدین کو ہدایت کی کہ بچوں کو چھتوں کے کناروں اور غیر محفوظ مقامات سے دور رکھیں۔ ان کا کہنا تھا کہ معمولی سی لاپرواہی کسی بڑے حادثے کا سبب بن سکتی ہے، اس لیے موٹر سائیکل چلاتے وقت ہیلمٹ اور سیفٹی راڈ دونوں کا استعمال یقینی بنایا جائے۔ انہوں نے شہریوں کو بجلی کی تاروں اور کھمبوں کے قریب پتنگ بازی سے سختی سے منع کیا اور والدین پر زور دیا کہ وہ بچوں اور اہل خانہ کو خطرناک ڈور کے نقصانات سے آگاہ کریں۔ پولیس افسران نے کہا کہ تہوار کی خوشیوں کو محفوظ انداز میں منانا ہی ایک مہذب اور ذمہ دار معاشرے کی پہچان ہے۔