برطانیہ کا مشرقِ وسطیٰ کے لیے ہائی الرٹ، 16 ممالک کے لیے سفری انتباہ جاری

لندن :برطانوی دفترِ خارجہ نے ایران اور مشرقِ وسطیٰ میں بڑھتی ہوئی کشیدگی اور سیکیورٹی خطرات کے پیش نظر اپنے شہریوں کے لیے سخت سفری انتباہ جاری کر دیا ہے۔ برطانوی میڈیا کے مطابق 16 ممالک کے لیے جاری کردہ ایڈوائزری میں سیاحوں کو غیر معمولی احتیاط برتنے کی ہدایت کی گئی ہے۔
دفترِ خارجہ کے مطابق ایران میں ملک گیر مظاہرے، تہران میں پُرتشدد کریک ڈاؤن اور امریکا کے ساتھ بڑھتے ہوئے تناﺅ کے باعث سیکیورٹی صورتحال تشویشناک ہو چکی ہے، جس سے غیر ملکی شہریوں کو سنگین خطرات لاحق ہو سکتے ہیں۔
رپورٹ میں بتایا گیا ہے کہ قبرص، مصر اور دبئی جیسے مقبول سیاحتی مقامات کا سفر کرنے والے برطانوی شہریوں کو بھی محتاط رہنے کی ہدایت کی گئی ہے۔ انتباہی فہرست میں ترکیہ، سعودی عرب، شام، قطر، عمان، لیبیا، لبنان، کویت، عراق، اردن، بحرین، یمن اور ایران شامل ہیں۔
اسی دوران ایران کی جانب سے فضائی حدود کو اچانک تجارتی پروازوں کے لیے بند کیے جانے سے بین الاقوامی فضائی آپریشن متاثر ہوا ہے، جس کے باعث سیاحوں کو شدید مشکلات کا سامنا ہے۔ اگرچہ بعض مقامات پر پروازیں محدود پیمانے پر بحال کی گئی ہیں، تاہم برطانوی شہریوں کو اضافی حفاظتی اقدامات اختیار کرنے کی ہدایت برقرار رکھی گئی ہے۔
سفری انتباہ کے بعد برطانوی مسافروں میں بے چینی پائی جاتی ہے اور خدشہ ظاہر کیا جا رہا ہے کہ اس صورتحال سے چھٹیاں منانے والے لاکھوں سیاح متاثر ہو سکتے ہیں۔ دفترِ خارجہ نے زور دیا ہے کہ مشرقِ وسطیٰ اور ملحقہ ممالک کا سفر کرنے والے افراد ہر وقت الرٹ رہیں اور کسی بھی ہنگامی صورتحال سے نمٹنے کے لیے پیشگی تیاری رکھیں۔