وفاقی وزیر داخلہ محسن نقوی کا نیشنل پولیس اکیڈمی کا دورہ، اے ایس پیز کے لیے پلاٹس، بیجنگ میں تربیت اور تنخواہوں میں اضافے کا اعلان

اسلام آباد:وفاقی وزیر داخلہ محسن نقوی نے نیشنل پولیس اکیڈمی کے دورے کے موقع پر زیر تربیت اے ایس پیز کے لیے بڑے فیصلوں کا اعلان کیا ہے، جس کے تحت پاسنگ آؤٹ پر افسران کو پلاٹس کی فراہمی، ایک ماہ کی تربیت کے لیے چین (بیجنگ) بھیجنے اور پولیس افسران کی تنخواہوں میں بہتری سمیت پروموشن کے مسائل فوری حل کرنے کی منظوری دے دی گئی ہے۔
انہوں نے واضح کیا کہ پولیس فورس کو بین الاقوامی معیار کے مطابق ڈھالنے کے لیے پیشہ ورانہ مہارت اور مالی آسودگی کو یقینی بنایا جائے گا۔وزیر داخلہ نے زیر تربیت افسران سے خطاب کرتے ہوئے کہا کہ موجودہ پولیس بیچ کو جدید تقاضوں کے مطابق تیار کرنا حکومت کی ترجیح ہے۔ اس سلسلے میں افسران کی مالی مشکلات دور کرنے کے لیے خصوصی اقدامات کیے جا رہے ہیں اور نیشنل پولیس فاؤنڈیشن کے تعاون سے انہیں جدید سہولیات دی جائیں گی۔دورے کے دوران وزیر داخلہ نے اکیڈمی کی تزئین و آرائش کے کام کا معائنہ کیا، جن میں کانفرنس ہال، ڈائننگ ہال اور دیگر رومز شامل تھے۔
انہوں نے کام کی کوالٹی کے حوالے سے کمانڈنٹ اکیڈمی محمد ادریس کو ضروری ہدایات جاری کیں۔اس موقع پر کمانڈنٹ نیشنل پولیس اکیڈمی نے وزیر داخلہ کو جامع بریفنگ دی جبکہ ڈپٹی کمانڈنٹ، ایڈیشنل ڈپٹی کمشنر اسلام آباد اور دیگر اعلیٰ افسران بھی ان کے ہمراہ تھے۔