چکوال (بیورو چیف جلیل نقوی): حکومتِ پنجاب کی ہدایات پر پیرا فورس چکوال نے ضلع بھر میں غیر قانونی تجاوزات کے خلاف تیسرے روز بھی بھرپور آپریشن جاری رکھا۔ کارروائیوں کے دوران مختلف بازاروں، مرکزی شاہراہوں، مارکیٹوں اور عوامی مقامات سے تجاوزات کا خاتمہ کیا گیا۔پیرا فورس کی ٹیموں نے اچانک کارروائیاں کرتے ہوئے سڑکوں، فٹ پاتھوں اور سرکاری اراضی پر قائم تھڑے، ریڑھیاں، غیر قانونی شیڈز، بینرز اور دیگر رکاوٹیں ہٹا دیں۔ متعدد دکانداروں کی جانب سے سامان سڑک تک پھیلانے پر وارننگ جاری کی گئی جبکہ بعض افراد کو جرمانے بھی کیے گئے۔ترجمان پیرا فورس کے مطابق تجاوزات کے باعث ٹریفک کی روانی متاثر ہونے کے ساتھ شہریوں کو آمدورفت میں مشکلات کا سامنا تھا، جس کے پیش نظر کارروائیوں کا دائرہ مزید وسیع کر دیا گیا ہے۔
آپریشن کے دوران اہلکاروں نے مختلف بازاروں کا دورہ کر کے تاجروں کو حکومتی احکامات پر عملدرآمد کی ہدایت بھی کی۔ حکام کا کہنا ہے کہ سرکاری اراضی پر قبضہ یا غیر قانونی تجاوزات قائم کرنے والوں کے خلاف بلاامتیاز کارروائی جاری رہے گی۔