ماؤنٹ ماؤنگانوئی:نیوزی لینڈ نے تیسرے ٹیسٹ میں ویسٹ انڈیز کو 323 رنز سے شکست دے کر 3 ٹیسٹ میچوں کی سیریز 0-2 سے جیت لی، جیکب ڈفی کی پانچ وکٹوں کی شاندار کارکردگی فیصلہ کن ثابت ہوئی۔
ماؤنٹ ماؤنگانوئی میں کھیلے گئے میچ میں نیوزی لینڈ نے ویسٹ انڈیز کو میچ جیتنے کیلئے 462 رنز کا مشکل ہدف دیا تاہم ویسٹ انڈیز کی پوری ٹیم 138 رنز پر آئوٹ ہو گئی۔ویسٹ انڈیز کی ٹیم نے پانچویں دن اپنی اننگز کا آغاز 43 رنز بغیر کسی نقصان کے دوبارہ کیا تو اس کا پہلا کھلاڑی 87 کے مجموعی سکور پر آئوٹ ہوا جب برینڈن کنگ 67 رنز بنا کر آئوٹ ہوئے تاہم اس کے بعد کوئی بھی کھلاڑی اچھی کارکردگی کا مظاہرہ نہ کر سکا اور پوری ٹیم 138 رنز بنا کر آئوٹ ہو گئی۔نیوزی لینڈ کی جانب سے جیکب ڈفی نے 42 رنز کے عوض 5 وکٹیں حاصل کیں جبکہ اجاز پٹیل نے 23 رنز دے کر 3 کھلاڑی آؤٹ کیے۔
نیوزی لینڈ کے ڈیوون کونوے کو میچ کا بہترین کھلاڑی قرار دیا گیا، انہوں نے دونوں اننگز میں 227 اور 100 رنز اسکور کیے جبکہ کپتان ٹام لیتھم نے 137 اور 101 رنز بنائے۔ یوں یہ اوپننگ جوڑی فرسٹ کلاس کرکٹ کی تاریخ میں ایک ہی میچ میں دونوں اننگز میں سنچریاں سکور کرنے والی پہلی جوڑی بن گئی۔جیکب ڈفی کو سیریز میں 23 وکٹیں حاصل کرنے پر پلیئر آف دی سیریز قرار دیا گیا۔