اسلام آباد :اسلام آباد میں صدر مملکت آصف علی زرداری کی جانب سے اتحادی جماعتوں کے ارکانِ پارلیمنٹ کے اعزاز میں ایوانِ صدر میں عشائیہ دیا گیا، جس میں اتحادی قیادت اور اہم حکومتی شخصیات نے شرکت کی۔
ایوانِ صدر میں صدر مملکت کی جانب سے دیے گئے عشائیے میں وزیراعظم شہباز شریف، چیئرمین پیپلز پارٹی بلاول بھٹو زرداری، سابق اسپیکر قومی اسمبلی راجہ پرویز اشرف، سینیٹر شیری رحمان ٓ اور شازیہ مری شریک تھے۔
وفاقی وزرا میں وزیر قانون اعظم نذیر تارڑ، وزیر اطلاعات عطا تارڑ، مصدق ملک اور حنیف عباسی کے علاوہ چوہدری سالک حسین، سردار یوسف سمیت دیگر رہنما بھی عشائیے میں شریک ہوئے۔
ذرائع کے مطابق عشائیے میں بدھ کے روز ہونے والی 27ویں آئینی ترمیم پر قومی اسمبلی میں ووٹنگ سے متعلق مشاورت کی گئی۔ اتحادی جماعتوں کے درمیان آئندہ کے لائحہ عمل پر بھی بات چیت ہوئی۔
ایوانِ صدر میں وزیراعظم شہباز شریف اور صدر آصف زرداری کے درمیان ملکی سیاسی اور سیکیورٹی صورتحال پر بھی تفصیلی تبادلہ خیال ہوا۔
ملاقات کے دوران صدرِ مملکت اور وزیراعظم نے دہشت گردی کے حالیہ واقعات کی مذمت کی اور دونوں قائدین نے دہشت گردوں کے خلاف جنگ جاری رکھنے کا عزم کیا۔
ملاقات میں چیئرمین سینیٹ یوسف رضا گیلانی، اسپیکر قومی اسمبلی ایاز صادق، وزیر داخلہ محسن نقوی، خالد حسین مگسی عبدالعلیم خان اور دیگر بھی موجود تھے۔