باجوڑ: پاک فوج اور فرنٹیئر کور خیبر پختونخوا کی جانب سے ضلع باجوڑ کے علاقے سلیمان خیل میں سب سے بڑی جامع مسجد کی تعمیر و تزئین مکمل کر لی گئی۔ مسجد کی بحالی پر مقامی عوام نے پاک فوج سے بھرپور تشکر کا اظہار کیا۔
ذرائع کے مطابق سلیمان خیل کی یہ تاریخی جامع مسجد دہشت گردوں کے حملے میں شہید ہو گئی تھی۔ فتنۂ خوارج کے اس حملے کے نتیجے میں مسجد کا سولر سسٹم، دروازے، کھڑکیاں اور دیگر حصے تباہ ہو گئے تھے، جبکہ عمارت کو بھی شدید نقصان پہنچا تھا۔
فرنٹیئر کور خیبر پختونخوا نے مسجد کی دوبارہ مرمت اور تزئین کا عمل مکمل کیا۔ مسجد کے اندر نئے قالین، انورٹر، پنکھے، سولر سسٹم اور دیگر تمام ضروری اشیاء دوبارہ نصب کی گئیں۔مسجد کی مکمل بحالی کے بعد تمام سہولیات کو فعال کر دیا گیا ہے، جس سے مقامی آبادی کو نماز اور مذہبی اجتماعات کے لیے ایک بہتر اور پرامن ماحول میسر آ گیا ہے۔
علاقہ مکینوں نے کہا کہ پاک فوج نے مسجد کی تزئین و آرائش کر کے اس تاریخی عبادت گاہ کو دوبارہ زندہ کر دیا ہے۔ عوام نے اس نیک قدم پر پاک فوج کا تہہ دل سے شکریہ ادا کرتے ہوئے اسے علاقے میں امن، استحکام اور خدمتِ خلق کی بہترین مثال قرار دیا۔